ამერიკის შეერთებულმა შტატებმა ირანის წინააღმდეგ დაწესებული სანქციები გააფართოვა. ინფორმაციას შეერთებული შტატების სახაზინო დეპარტამენტი ავრცელებს.
საუბარია შეზღუდვების სიის სამი ორგანიზაციითა და ექვსი ინდივიდით გაფართოებაზე.
მანამდე მაიკ პომპეომ განაცხადა, რომ აშშ-ს სურს შეცვალოს ირანის რეჟიმის ქცევა და არა თავად რეჟიმი.
9 მაისს ცნობილი გახდა, რომ ოფიციალური ვაშინგტონი ირანის წინააღმდეგ სანქციებს 180 დღეში აღადგენდა და ის შეზღუდვები რაც ამ ქვეყნის წინააღმდეგ ბირთვული შეთანხმების ფარგლებში იყო დაწესებული კვლავ განახლდებოდა. 24 მაისს კი ცნობილი გახდა, რომ აშშ-მა ირანში არსებულ ცხრა ინდივიდსა და ორგანიზაციას სანქციები დაუწესა.
2015 წელს აშშ-მა, საფრანგეთმა, გერმანიამ, დიდმა ბრიტანეთმა, ჩინეთმა და რუსეთმა ირანთან მიღწიეს შეთანხმებას, რომელიც ითვალისწინებს თეირანის მიერ ბირთვულ პროგრამაზე უარის სანაცვლოდ საერთაშორისო სანქციების, მათ შორის ირანის მიერ ნავთობით ვაჭრობის აკრძალვის გაუქმებას.