მთავრობის ადმინისტრაციაში ზაზა სარალიძის და პრემიერმინისტრის შეხვედრა დასრულდა.
პრემიერსა და შს მინისტრთან შეხვედრის შემდეგ ზაზა სარალიძემ განაცხადა, რომ თუ 10 რიცხვამდე არ გადაიდგმება კონკრეტული ნაბიჯები, იგივე აზრზე რჩება და მოთხოვნები არ შეიცვლება.
“აბსოლუტურად ყველა პირი უნდა იყოს დაკავებული, ვინც მოკლა, ვინც ხელი დააფარა, გამომძიებლებმაც და პროკურორებმაც და ყველა, ვინც მათ მფარველობდა,”- თქვა სარალიძემ.
ზაზა სარალიძის ადვოკატის თქმით, პრემიერთან და შს მინისტრთან შეხვედრამ მშვიდად ჩაიარა და არსებობს მზაობა მთავრობიდან, რომ საქმეს მიეცეს მსვლელობა. მისი თქმით, ელოდებიან რომ დააკავონ ყველა ის პირი, ვინც არამხოლოდ მკვლელობაში, არამედ საქმის გაყალბებასა და მტკიცებულებათა განადგურებაშიც მიიღო მონაწილეობა.
მანამდე სარალიძე და მაჩალიკაშვილი პრემიერთან შეხვედრაზე შევიდნენ. შეხვედრის შემდეგ, პანკისში სპეცოპერაციის შედეგად გარდაცვლილი თემირლან მაჩალიკიაშვილის მამის, მალხაზ მაჩალიკაშვილის ადვოკატმა თქვა, რომ პრემიერთან და შს მინისტრთან შეხვედრაზე განიხილეს საქმის დეტალები.
მისი თქმით, აქცენტები გაკეთდა მაჩალიკაშვილის მკვლელობასა და მის უდანაშაულოდ ცნობაზე. მისივე აღნიშვნით, კონკრეტული შედეგი მოლაპარაკებას არ ჰქონია, მაგრამ აქვთ “პრემიერის სიტყვა და პირობა”. შეხვედრამდე მაჩალიკაშვილი ამბობდა: “პრემიერი არ შემხვდა იმიტომ, რომ ვარ მუსლიმი.” თუმცა, აუდიენცია მაინც შედგა.