მიწისძვრის შედეგად, აზერბაიჯანის ზაქათალას რაიონში სახლები და სხვადასხვა ობიექტები დაზიანდა.
„გუშინ ქალაქ ზაქათალადან სამხრეთით 24 კილომეტრში მოხდა დაახლოებით 6 მაგნიტუდის სიმძლავრის მიწისძვრა. დაღუპულები და დაშავებულები არ არიან. ზიანი მიადგა საკარმიდამო მიწის ნაკვეთებს, სახლების კედლებზე გაჩნდა ბზარები. მიწისძვრის შედეგად მიყენებული ზარალის შესახებ შეტყობინებებს ამ დრომდე ვიღებთ“, – განაცხადა ზაქათალას რაიონის საგანგებო სიტუაციების რაიონული კომისიის თავმჯდომარემ ტოფიგ ახმედოვმა.
მიწისძვრის შემდეგ, სამედიცინო დაწესებულებებს სტრესის გამო 31-მა ადამიანმა მიმართა. 63 წლის მამაკაცი კი გულის შეტევით გარდაიცვალა.
5.6 (ML) მაგნიტუდის მიწისძვრა აზერბაიჯანში თბილისის დროით 22:40 საათზე, საქართველოს სახელმწიფო საზღვრიდან 28 კმ.-ში მოხდა. მიწისძვრა თბილისის მოსახლეობამაც შეიგრძნო.