სახელმწიფო საიდუმლოს გასაჯაროებაში არასამთავრობო ორგანიზაცია ირაკლი სესიაშვილს ადანაშაულებს. თავდაცვისა და უშიშროების კომიტეტის თავმჯდომარეს აჰმედ ჩატაევის შესახებ შაბათისკურიერში გაკეთებული განცხადების გამო შესაძლოა, ახსნა-განმარტების მიცემა პროკურატურისთვის მოუწიოს.
არასამთავრობო ორგანიზაცია სესიაშვილს ჩატაევის აგენტად მოხსენიების გამო, კანონდარღვევაში ადანაშაულებს და საქმის გამოძიებას ითხოვს.
კანონი, რომლის შესაძლო დარღვევაშიც ირაკლი სესიაშვილს ადანაშაულებენ, სახელმწიფო საიდუმლოს დაცვას არეგულირებს. კანონში წერია, რომ დაუშვებელია ისეთი ინფორმაციის გასაჯაროება, რომელიც ზიანს მიაყენებს ქვეყნის ინტერესებს.
დაარღვია თუ არა სესიაშვილმა კანონი, ამას დაინტერესების შემთხვევაში გამოძიება დაადგენს. მანამდე კი, თავდაცვისა და უშიშროების კომიტეტის თავმჯდომარეს ქვეყნის წინაშე პასუხისმგებლობები დღეს პრეზიდენტის ადმინისტრაციიდან შეახსენეს.
ირაკლი სესიაშვილს ბრალდებებზე არ უპასუხია. კომიტეტის თავმჯდომარემ კურიერის სატელეფონო ზარებს მთელი დღის განმავლობაში არ უპასუხა. საინფორმაციო სააგენტოსთვის მიცემულ ინტერვიუში კი სესიაშვილი ბრალდებებს უარყოფს.