საბერძნეთში მოკლული ქეთი სუთიძის დაკრძალვას მისი შვილები ვერ დაესწრებიან.
ამ ინფორმაციას Diaspora.ge ავრცელებს.
ამის მიზეზი მოკლულის ყოფილი ქმრის გადაწყვეტილებაა, რომელიც ყოფილი ცოლის მკვლელობის ბრალდებით ბერძენმა სამართალდამცავებმა დააკავეს.
ადგილობრივი გამოცემა, espressonews.gr იუწყება, რომ მკვლელობის მიზეზი ეჭვიანობა გახდა.
შემთხვევა, 15 მაისს, ათენის გარეუბანში მოხდა. ბერძენმა პოლიციელებმა ახალგაზრდა ქალი ჩაკეტილ სახლში ქამრით გაგუდული იპოვნეს. მეზობლების გამოკითხვის შემდეგ დადგინდა, რომ ქათამაძეს სახლის გასაღები ჰქონდა, ყოფილ მეუღლეს ხშირად სტუმრობდა. მკვლელობას წინ რამდენიმე ჩხუბი უძღოდა. მეზობლებმა გაიხსენეს, რომ გარდაცვლილის სახლიდან 10 და 13 მაისს ყვირილის ხმა ისმოდა.
ბერძნული გამოცემა წერს, რომ მკვლელობის დღეს სუთიძემ ბავშვები სკოლაში წაიყვანა და შინ დაბრუნდა, სადაც ყოფილი მეუღლე მივიდა. ჩხუბის შემდეგ ქათამაძემ ქეთი სუთიძე საწოლზე დააბა და ქამრით გაგუდა, შემდეგ ცხედარს საბანი დააფარა, კარი ჩაკეტა და მიიმალა.
სასამართლო პროცესს, რომელიც გუშინ შედგა, გარდაცვლილისა და ქათამაძის 12 წლის საერთო შვილი ესწრებოდა. მოკლულსა და ბრალდებულს 12 წლის ვაჟი და 9 წლის გოგონა ჰყავთ. საბერძნეთში მცხოვრები ქართველების ინფორმაციით, დაკავებულის დედამ და მულმა უარი განაცხადეს ბავშვების საქართველოში გამგზავრებაზე. მოზარდების მეურვე, მკვლელობაში ბრალდებული შალვა ქათამაძეა და ის შვილებს ნებართვას არ აძლევს საქართველოში დედის დაკრძალვას დაესწრონ.
წყარო: diaspora.ge