პეპლებზე და ყვავილებზე არ ვსაუბრობდით, საუბარი შეეხო ქვეყანაში შექმნილ პოლიტიკურ ვითარებას, – განუცხადა საქართველოში აშშ-ის ელჩის მოადგილესთან, ელიზაბეთ რუდთან სადილის შემდეგ ჟურნალისტებს „პატრიოტთა ალიანსის“ ერთ-ერთმა ლიდერმა, ირმა ინაშვილმა.
ირმა ინაშვილმა აღნიშნა, რომ შეხვედრის ყველა დეტალზე არ ისაუბრებს.
„ყველა დეტალზე სამწუხაროდ საუბარი არ შემიძლია. თემა რა თქმა უნდა ეხებოდა პოლიტიკურ პროცესს, ქვეყანაში საარჩევნო სისტემას ძალიან ბევრი დეტალი იყო განხილული. ზოგადად, ეს შეხვედრა იყო არაოფიციალური, უბრალოდ, ოჯახურ გარემოში. საარჩევნო სისტემას უკავშირდებოდა, მაგრამ ფორმატი იყო არაოფიციალური. ეს არ იყო შეხვედრა, სადაც რაიმე ტიპის შეთანხმება უნდა შედგეს. წარმოიდგინეთ, არაოფიციალურ გარემოში შეხვედრა-საუბარი იყო სხვადასხა თემაზე. შეთანხმება და რაღაც დოკუმენტზე, მემორანდუმზე ხელმოწერა არ ხდება ასეთ გარემოში. როგორც წესი, ისმენენ ჩვენს მოსაზრებებს, რას ვფიქრობთ ჩვენ, სხვა პოლიტიკოსები. ასევე, ელჩებს მოვუსმინეთ სხვადასხვა თემებზე. რა თქმა უნდა, პეპლებზე და ყვავილებზე არ ვსაუბრობდით, საუბარი შეეხო ქვეყანაში შექმნილ პოლიტიკურ ვითარებას“, – განაცხადა ირმა ინაშვილმა.