მადლობას გიხდით, რომ ყველანაირად ცდილობთ გვერდით დაუდგეთ ჩვენს ექიმებს! – დაავადებათა კონტროლის ცენტრი სოციალურ ქსელში განცხადებას ავრცელებს. დაავადებათა კონტროლის ცენტრი ყველას მადლობას უხდის და იმ კომპანიების სიას აქვეყნებს, რომელიც ცენტრს დაეხმარა.
„ძვირფასო კოლეგებო, მეგობრებო, გულშემატკივრებო და ჩვენო თანამემამულეებო. ბოლო თვეების განმავლობაში თითოეულ ჩვენგანს ისეთ რეალობაში გვიწევს ცხოვრება, სადაც ახალი კორონავირუსის (COVID-19) პანდემიამ მსოფლიო შეცვალა და სრულიად განსხვავებული წესრიგი დაადგინა.
მსოფლიო გაერთიანდა საერთო მოწინააღმდეგის დასამარცხებლად, რომელმაც, სამწუხაროდ, მრავალ ქვეყნაში დაავადებულთა და გარდაცვლილთა საგანგაშო სტატისტიკა შეადინა. პანდემიასთან ბრძოლაში ჩართულია სხვადასხვა პროფესიის წარმომადგენელი, მათ შორის ასეულობით ათასი სამედიცინო პერსონალი, რომლებიც ბრძოლის წინა ხაზზე დგანან, ყოველდღიურად გვიჩვენებენ გმირობის მაგალითს და რუდუნებით ზრუნავენ თითოეული ადამიანის ჯანმრთელობასა და სიცოცხლეზე. ამ ძნელბედობის ჟამმა გააერთიანა მთელი ქვეყანა.
სახელმწიფო, ჩვენი მოქალაქეები, სხვადასხვა ადგილობრივი თუ საერთაშორისო ორგანიზაციები, რომლებიც საქართველოში მოღვაწეობენ, გვერდით დაუდგნენ საქართველოს სამედიცინო საზოგადოებას.
სასიხარულოა, რომ ყოველი თქვენგანი, ჩვენი ქვეყნის მოქალაქე თუ სტუმარი, ყველანაირად ცდილობთ გვერდით დაუდგეთ ჩვენს ექიმებს და ქვეყნის ჯანდაცვის სექტორს, შეძლებისდაგვარად შეუმსუბუქოთ მძიმე შრომა, დახმარების ხელი გამოგვიწოდოთ სხვადასხვა შემოწირულობითა თუ გამხნევებით და ამით წვლილი შეიტანოთ ეპიდემიასთან გამკლავების საქმეში.
დაავადებათა კონტროლისა და საზოგადოებრივი ჯანმრთელობის ეროვნული ცენტრი გულითად მადლობას გიხდით სოლიდარობის, გულშემატკივრობისა და მხარდაჭერისთვის. ფასდაუდებელია თითოეული თქვენგანის მიერ შეტანილი წვლილი ახალი კორონავირუსის პანდემიის წინააღმდეგ ბრძოლაში.
დაავადებათა კონტროლის ცენტრის სიაში 86-ზე მეტი იურიდიდული და ფიზიკური პირის სახელია აღნიშნული“ – წერია დაავადებათა კონტროლის ცენტრის განცხადებაში.