“ზოგიერთის შეფასებით, საქართველოს დიდი დრო დასჭირდა ნატოში ინტეგრაციისთვის”

“საქართველოს ძალიან ბევრ მოქალაქეს აქვს ჩამოყალიბებული პოზიცია და ტაქსის ბევრმა მძღოლმაც კი იცის, რა ითქვა ბუქარესტის სამიტზე“,-ამის შესახებ ნატოსა და ევროკავშირის შესახებ საინფორმაციო ცენტრის ახალი ოფისის გახსნაზე ნატოს გენერალური მდივნის მოადგილემ, ალექსანდრე ვერშბოუმ განაცხადა.
მისი თქმით, იმის გამო, რომ სხვადასხვა მხრიდან მოდის არასწორი ინფორმაცია, ზოგიერთის შეფასებით, საქართველოს ნატოში ინტეგრაციისთვის დიდი დრო დასჭირდა.
„მოგილოცავთ ცენტრის გახსნას. ჩემთვის დიდი პატივია აქ ყოფნა. მინდა მადლობა გადავუხადო ცენტრს იმ ღვაწლისთვის, რომელიც მას მიუძღვის საქართველოს მოსახლეობის ცნობიერების ამაღლებაში, ნატოს მნიშვნელობის სწორად გაგებასთან დაკავშირებით. მნიშვნელოვანია, საზოგადოებისთვის სწორად იყოს მიწოდებული ინფორმაცია, თუ რას წარმოადგენს ნატო.
ეს პრობლემა დგას ნატოს წევრ ქვეყნებშიც და ხშირად მიწევს იმის ახსნა, რომ ეს არ არის მხოლოდ სამხედრო ალიანსი და ნატო პოლიტიკური ორგანიზაციაც არის. ზოგიერთის შეფასებით, საქართველოს დიდი დრო დასჭირდა ნატოში ინტეგრაციისთვის და ეს შეფასებები გამომდინარეობს იქიდან, რომ არასწორი გზავნილები ისმის სხვადასხვა მხრიდან. თუმცა საქართველოს ბევრ მოქალაქეს ჩამოყალიბებული აქვს თავისი პოზიცია ნატოსთან მიმართებაში და ძალიან ბევრმა ტაქსის მძღოლმაც კი იცის, რა ითქვა ბუქარესტის სამიტზე“, – განაცხადა ვერშბოუმ.