დაავადებათა კონტროლის ეროვნული ცენტრის ხელმძღვანელი ამირან გამყრელიძე, მისი მოადგილე პაატა იმნაძე და გადამდებ დაავადებათა დეპარტამენტის ხელმძღვანელი ხათუნა ზახაშვილი ტრადიციულ ბრიფინგს მართავენ, რომელზეც არსებულ ეპიდსიტუაციას მიმოიხილავენ და მედიისა და მოსახლეობის შეკითხვებს პასუხობენ.
ამირან გამყრელიძემ 20 მაისის მონაცემებით, ქვეყანაში ჩატარებული ტესტირების რაოდენობაზე ისაუბრა.
42 408 გამოკვლეული ნიმუშიდან კორონავირუსი დადასტურდა 713 შემთხვევაში.
ამირან გამყრელიძის ცნობით, პისიარ ტესტირება ქვეყანაში ჩატარებულია 45 000-მდე. მათგან 3 000, დაახლოებით, არის განმეორებითი ტესტირება, იმ შემთხვევებში, როცა გაწერის წინ, პროტოკოლის მიხედვით, ორჯერ მოწმდება ტესტის პასუხი და ასევე – კარანტინიდან გასვლამდე, მე-13-14 დღეს.
ქვეყანაში ინფიცირებულთა 67%, ანუ 475 ადამიანი გამოჯანმრთელდა. გამყრელიძის შეფასებით, ეს „კარგი მაჩვენებელია”. სიკვდილიანობის მაჩვენებელი 1,72%-ია.
მისი თქმით, ლაბორატორიული კვლევა ქვეყანაში უფრო ინტენსიურად ტარდება. გუშინ დილის 09:00-ის მონაცემებით, 1773 ტესტიჩატარდა 15 ლაბორატორიაში. კვლევის დაახლეობით 75% ნაწილდება დაავადებათა კონტროლის ცენტრის ლუგარის, ბათუმისა და ქუთაისის ლაბორატორიებზე.
ამირან გამყრელიძემ იმედი გამოთქვა, რომ სულ მალე გაფართოვდება ტესტირება, რადგან შემსუბუქების ღონისძიებები იწყება და ვირუსის გავრცელება მაქსიმალურად უნდა გაკონტროლდეს.