გურჯაანის მუნიციპალიტეტის სოფელ ჩუმლაყში მომხდარ შემთხვევაში მონაწილე მესამე პირს, პოლიცია ამ დრომდე ეძებს.
სამართალდამცავებისათვის ცნობილია, რომ ცეცხლსასროლი იარაღიდან რამდენიმე გასროლა, სწორედ მესამე პირმა განახორციელა.
ადგილობრივების ინფორმაციით, ინციდენტამდე რამდენიმე საათით ადრე, ახალგაზრდები, სოფელ ჩუმლაყში, დაჭრილი ანზორ მოსესოვის საცხოვრებელ სახლში ქეიფობდნენ. მამაკაცები ნასვამები იყვნენ, თუმცა, რა გახდა დაპირისპირების კონკრეტული მიზეზი, ჯერჯერობით, უცნობია.
მესამე პირის დასაკავებლად, სამძებრო-საგამოძიებო მოქმედებები ამ წუთამდე მიმდინარეობს.
შეგახსენებთ, შემთხვევა სოფელ ჩუმლაყში, წუხელ მოხდა. ახალგაზრდებს შორის ურთიერთშელაპარაკება, ფიზიკურ, შემდეგ კი სისხლიან დაპირისპირებაში გადაიზარდა. გარდაცვლილია ერთი და მძიმედაა დაჭრილი ერთი პირი.
გამოძიება მომხდარ ფაქტზე, სისხლის სამართლის კოდექსის 108- ე და 19, 109- ე მუხლებით მიმდინარეობს.