საქართველოს მოსახლეობამ ყველაფერი უნდა გააკეთოს იმისთვის, რომ ტურისტულად მნიშვნელოვან რეგიონებს კრიზისით გამოწვეული პრობლემები შეუმსუბუქოს. ამის შესახებ გიორგი გახარიამ მთავრობის სხდომაზე განაცხადა. პრემიერ-მინისტრმა მოქალაქეებს ქვეყანაში აქტიური მოგზაურობისკენ მოუწოდა.
„ჩვენ ვიწყებთ ახალ პროგრამას „იმოგზაურე საქართველოში“ და თითოეულ თქვენგანს მინდა ვთხოვო ამ პროგრამაში ჩავერთოთ მაქსიმალურად აქტიურად. ყველას კარგად უნდა გვესმოდეს, რომ ახლა პანდემიის წყალობით გვაქვს შესაძლებლობა ხელახლა აღმოვაჩინოთ ჩვენი ქვეყანა და მოვემზადოთ იმისთვის, რომ როდესაც სრულად გაიხსნება საერთაშორისო ტურიზმი, საუკეთესო გიდები ვიყოთ ჩვენი სტუმრებისთვის და ვიზიტორებისთვის. ამიტომ აქტიურად უნდა გამოვიყენოთ ეს დრო“, – აღნიშნა გახარიამ.
ეკონომიკისა და მდგრადი განვითარების სამინისტროს ტურიზმის ეროვნულმა ადმინისტრაციამ ახალი კამპანია „აღმოაჩინე ის რაც შენია – იმოგზაურე საქართველოში“ პოსტპანდემიურ პერიოდში შიდა ტურიზმის წასახალისებლად წამოიწყო.