მესტიის მუნიციპალიტეტში რაც მალე ჩავატარებთ სრულ ტესტირებას მით უფრო მალე მოიხსნება გამკაცრებული შეზღუდვები – ამის შესახებ რეგიონულ საკითხებში პრემიერ-მინისტრის მრჩეველმა, სოზარ სუბარმა „ქრონიკაში“ განაცხადა.
„კოვიდი არსად არ წასულა და ის ნებისმიერ წუთს შეიძლება აფეთქდეს. ამის მაგალითია ის, რაც ახლა ზემო სვანეთში, მესტიის მუნიციპალიტეტში ხდება. ვფიქრობ, რომ ძალიან მალე შევძლებთ სრული სურათი გვქონდეს. რაც მალე ჩავატარებთ სრულ ტესტირებას მით უფრო მალე მოიხსნება გამკაცრებული შეზღუდვები“, – აღნიშნა სოზარ სუბარმა.
უწყებათაშორისმა საკოორდინაციო საბჭოს გადაწყვეტილებით, დაბა მესტიასა და მესტიის მუნიციპალიტეტის სხვა სოფლებში, დამატებითი შეზღუდვები წესდება. დეტალებს გაეცანით აქ.
10 აგვისტოს კორონავირუსის 25 ახალი შემთხვევიდან 17 სამეგრელო-ზემო სვანეთში დადასტურდა. ამ დროისთვის საქართველოში კორონავირუსის 1 250 შემთხვევაა დადასტურებული. განკურნებულთა რაოდენობა სულ 1 010-ს შეადგენს. ამასთან, უცხოეთიდან სამკურნალოდ გადმოყვანილია საქართველოს 41 მოქალაქე. კორონავირუსის შედეგად, ქვეყანაში 17 პაციენტი გარდაიცვალა.
კარანტინის რეჟიმში იმყოფება 7 068 მოქალაქე, ხოლო სტაციონარში მეთვალყურეობის ქვეშ – 242.
ვირუსით ინფიცირების პირველი შემთხვევა ქვეყანაში 2020 წლის 26 თებერვალს დადასტურდა. 21 მარტს საქართველოში საგანგებო მდგომარეობა ამოქმედდა, 31 მარტიდან კი – საყოველთაო კარანტინის რეჟიმი.