ძალიან ბევრი შემთხვევაა, როდესაც კოვიდგადატანილ პაციენტებს ურეკავენ ნათესავები, ახლობლები და სთხოვენ მათ იმ დანიშნულების სქემებს, რითიც ისინი იტარებდნენ მკურნალობას, – ამის შესახებ პულმუნოლოგმა, კახა ვაჭარაძემ „რუსთავი-2“-ის ეთერში განაცხადა.
„ორი ერთნაირი პაციენტი არ არსებობს, ერთი და იგივე დაავდების ერთნაირი მიმდინარეობა არ არსებობს, ამიტომაც, მე ვურჩევდი, რომ დაუკავშირდნენ ოჯახის ექიმს. მე მესმის, რომ ძალიან გადატვირთულები არიან ოჯახის ექიმები, მაგრამ მაინც სჯობს ექიმის ერთი პროფესიული რჩევა, 10 არაპროფესიონალის რჩევას.
განსაკუთრებით საფრთხილოა ანტიკუაგულანტების, სტეროიდების დანიშვნა, თუნდაც სხვადასხვა ანტიბიოტიკოთერაპიის, იმიტომ, რომ ანტიბიოტიკოთერაპიას აქვს თავისი სქემები, მისი დაწყების ბაზისური ფაზა, გაგრძელების და მისი დამთავრების. აქ ჩვენ შეგვიძლია ისეთი გამოუსწორებელი შეცდომები დავუშვათ, რის ფონზეც შეიძლება მერე განვითარდეს მეორადი რეზისტენტობა, რაც თავისთავად ძალიან მაღალია სამხრეთის ქვეყნებში და მათ შორის საქართველოშიც. რაც შეეხება ანტიკუაგულაციურ მკურნალობას და ჰორმონოთერაპიას, ამან რასაკვირველია შეიძლება ორგანიზმში გამოიწვიოს ის დისბალანსი, რომელიც შემდეგ შეიძლება ძალიან ცუდად დამთავრდეს ჩვენი პაციენტის ჯანმრთელობისთვის“, – განაცხადა კახა ვაჭარაძემ.