აშშ-ის კონგრესის წარმომადგენელთა პალატის სპიკერმა, ნენსი პელოსიმ განაცხადა, რომ დონალდ ტრამპი საფრთხეს წარმოადგენს ამერიკისთვის და მან თანამდებობა უნდა დატოვოს.
„ჩვენ ვიცით, რომ შეერთებული შტატების პრეზიდენტმა ჩვენი ქვეყნის წინააღმდეგ აჯანყება წააქეზა. ის უნდა წავიდეს, ის აშკარა საფრთხეა ამ ქვეყნისთვის“, – აღნიშნა ნენსი პელოსიმ იმპიჩმენტის პროცედურაზე სიტყვით გამოსვლისას.
წარმომადგენელთა პალატის სპიკერმა ასევე განაცხადა, რომ პრეზიდენტმა ტრამპმა არაერთხელ მოიტყუა არჩევნების შედეგების შესახებ და ეჭვქვეშ დააყენა დემოკრატია.
„ვფიქრობ, რომ სენატმა პრეზიდენტი უნდა გაასამართლოს, რაც უზრუნველყოფს რესპუბლიკის უსაფრთხოებას ამ ადამიანისგან, რომელიც ასე მტკიცედ განწყობილია გაანადგუროს ყველაფერი ის, რაც ჩვენთვის ძვირფასია“, – განაცხადა მან.
დღეს აშშ-ის კონგრესის წარმომადგენელთა პალატა დონალდ ტრამპის იმპიჩმენტს უყრის კენჭს. 11 იანვარს აშშ-ის კონგრესის წარმომადგენელთა პალატამ აშშ-ის პრეზიდენტის, დონალდ ტრამპის იმპიჩმენტის რეზოლუციის ტექსტი გამოაქვეყნა. იმპიჩმენტის რეზოლუციის ტექსტი ერთი მუხლისგან შედგება, რომელშიც დონალდ ტრამპს ბრალი ამბოხის წაქეზებაში ედება.