„თავისივე მხარდამჭერებმა არაერთი პოსტი მიუძღვნეს, რომ დებატებისთვის მზად არ იყვნენ და წააგეს. ამას მოჰყვა შემდეგ ბატონი ახობაძის გაბრაზებული კომენტარები“, – განუცხადა „იმედინიუსს“ ირმა ინაშვილმა.
კერძოდ, ოპოზიციონერმა აქტივისტებმა გიორგი ახობაძემ და თორნიკე რაზმაძემ ირმა ინაშვილი საკუთარ გადაცემაში მიიწვიეს, რამაც აქტივისტების ნაწილის, მათ შორის ნატა ფერაძის უკმაყოფილება გამოიწვია. ფერაძის კითხვაზე, „ნებით იწვევთ ეთერებში და პოდკასტებში და იქ ცუმბუშებად რომ გამოჰყავხართ თქვენს მოედანზევე, თან თუ ფულს გიხდით ვინმე ამ ჯოჯოხეთის მაშხალას პოპულარიზაციაში?!“ – გიორგი ახობაძემ ინაშვილი შეურაცხმყოფლად მოიხსენია და დაწერა, რომ მისი სტუმრად მოწვევით, „კაიფობს და თავის ჭიას მაინც ახარებს“.
როგორც ირმა ინაშვილმა „იმედინიუსთან“ აღნიშნა, როდესაც რესპონდენტს გადაცემაში იწვევ, თუ რაიმე შეკითხვა გაქვს, ეს კითხვები მაშინ უნდა დაუსვა.
„საერთოდ, როდესაც ადამიანს, რესპონდენტს იწვევ გადაცემაში, თუ რაიმე შეკითხვა გაქვს, თუ რაიმე პრეტენზია გაქვს, როდესაც ის შენს ეთერში და შენს გადაცემაშია, ეს კითხვები მაშინ უნდა დაუსვა. როდესაც ეთერიდან მიდის, მერე კი არ უნდა დაწერო კომენტარები. ეს დებატები მათ წააგეს, თავისივე მხარდამჭერებმა ამის შესახებ არაერთი პოსტი მიუძღვნეს, რომ დებატებისთვის მზად არ იყვნენ და წააგეს. ამას მოჰყვა შემდეგ ბატონი ახობაძის გაბრაზებული კომენტარები. მეც ვუპასუხე. არაფერი არ არის ამაში ახლა ან გასაკვირი ან გასაოცარი“, – აღნიშნა მან.
კითხვაზე, მორალურად როგორ შეიძლება შეფასდეს ახობაძის კომენტარი, ირმა ინაშვილმა უპასუხა, რომ „მას და მისნაირებს მორალი არ აქვთ“.
„დავუწერე, რასაც ვფიქრობდი. ახობაძეს, მას და მისნაირებს მორალი არ აქვთ. ეს სულ სხვა ჯიშია“, – განაცხადა ირმა ინაშვილმა.