საერთაშორისო დამკვირვებლების აზრით, არჩევნები იყო კონკურენტუნარიანი და დაცული იყო ფუნდამენტური თავისუფლება, – განაცხადა ევროპის საბჭოს საპარლამენტო ასამბლეის დელეგაციის ხელმძღვანელმა, ტინი კოქსმა სტრასბურგში, ევროსაბჭოს საპარლამენტო ასამბლეის ზამთრის სესიაზე.
„საქართველოს საკანონმდებლო ცვლილებები, რომელიც მიღებულია ოდირთან, ევროპის საბჭოსთან მჭიდრო თანამშრომლობითა და რეკომენდაციების გათვალისწინებით, საქართველოს დაეხმარა სამართლებრივი ჩარჩოს შექმნაში. ეს არჩევნები კონკურენტუნარიანი და თავისუფალი იყო. არჩევნებში მონაწილეობა 48 პარტიამ მიიღო და ათი პარტიის წარმომადგენლები აირჩიეს პარლამენტში. მმართველმა პარტიამ მკაფიო ხაზი არ გაავლო მასა და სახელმწიფოს შორის. მეორე პრობლემაა ის, რომ სხვა პარტიებმა გადაწყვიტეს, საპარლამენტო საქმიანობისთვის ბოიკოტი გამოეცხადებინათ. საქართველოზე თანამომხსენებლებმა გააკეთეს განცხადება და პოლიტიკურ პარტიებს მოუწოდეს, შეუდგნენ საპარლამენტო საქმიანობას. ეს ჭკვიანური რჩევაა. მეც მინდა, პარტიებს დიალოგისკენ მოვუწოდო“ – განაცხადა ტინი კოქსმა.
სტრასბურგში ევროპის საბჭოს საპარლამენტო ასამბლეის ზამთრის სესია გაიხსნა. საბჭო, ამ წუთებში, საქართველოს 2020 წლის საპარლამენტო არჩევნების შესახებ, საპარლამენტო ასამბლეის სადამკვირვებლო მისიის მიერ მომზადებულ ანგარიშს განიხილავს, რომლის მომხსენებელი მისიის ხელმძღვანელი, ჰოლანდიელი დეპუტატი ტინი კოქსია.
უფლებამოსილების შეწყვეტასთან დაკავშირებით, ოპოზიციონერთა განცხადებებს საპროცედურო საკითხთა კომიტეტი 27 და 28 იანვარს განიხილავს. შემდეგ, რეგლამენტის თანახმად, საკითხი წარედგინება ბიუროს და 2 თებერვალს საქართველოს პარლამენტი კენჭს უყრის მათი უფლებამოსილების შეწყვეტის საკითხს.
საერთაშორისო საზოგადოების მოწოდებების მიუხედავად, სეუერთდენ საპარლამენტო საქმიანობას, ბოლო რამდენიმე დღეა, ოპოზიციამ რევოლუციისკენ მოწოდებები კვლავ გაააქტიურა. ისინი პოზიციას არ ცვლიან და აცხადებენ, რომ საპარლამენტო მანდატებზე უარს ამბობენ, თუ მათი მოთხოვნები არ შესრულდება. რევოლუციური სცენარისა და „ცხელი გაზაფხულის“ დაანონსების მიუხედავად, ოპოზიციონერები აცხადებენ, რომ პროტესტის მშვიდობიანი გზით გამოხატვას გეგმავენ.