ყველამ პირდაპირ ეთერში იხილა, რაც მოხდა. პოლიციას ჩვენთვის არც ოქმი გადმოუცია და არც განჩინება, – ამის შესახებ ნიკა მელია ადვოკატმა, გიორგი კონდახაშვილმა „ტვ პირველის“ ეთერში განაცხადა.
მისივე თქმით, მან არ იცის, ნიკა მელია სად გადაიყვანეს. რაც შეეხება კითხვას, როგორ აპირებენ სამართლებრივი ბრძოლის გაგრძელებას, გიორგი კონდახაშვილმა განაცხადა, რომ ყველა ინსტრუმენტს გამოიყენებენ.
„აუცილებლად მივმართავთ სტრასბურგის სასამართლოს. იურისტთა ჯგუფი ვმუშაობთ ამაზე და ყველა მექანიზმს გამოვიყენებთ, რათა ნათელი გავხადოთ, რომ ეს საქმე არის პოლიტიკურად მოტივირებული და მას არა აქვს სამართლებრივი საფუძველი“, – განაცხადა გიორგი კონდახაშვილმა.
ნიკა მელიას ედავებიან ჯგუფური ძალადობის ხელმძღვანელობას და მასში მონაწილეობას. საქმე ეხება 2019 წლის 20 ივნისს პარლამენტის შენობასთან განვითარებულ მოვლენებს. მაშინ აქციაზე ნიკა მელიამ იქ შეკრებილ ადამიანებს მიმართა, რომ მათი ადგილი პარლამენტს გარეთ არ იყო და ისინი პარლამენტის შენობაში უნდა ყოფილიყვნენ. ამის შემდეგ სიტუაცია დაიძაბა და იქ შეკრებილები სამართალდამცველებს დაუპირისპირდნენ.
2019 წლის 27 ივნისის განჩინებით, ნიკა მელიას აღკვეთის სახით 30000-ლარიანი გირაო შეეფარდა, მაშინ პარლამენტმა მას დეპუტატის იმუნიტეტი პირველად მოუხსნა და სასამართლოს განჩინება აღსრულდა. მან პირველ ჯერზე გადაიხადა 30000 ლარი, თუმცა მას შემდეგ რაც, 2020 წლის 1-ელ ნოემბერს პარლამენტთან აქციაზე ელექტრონული სამაჯური დემონსტრაციულად მოიხსნა, გენერალურმა პროკურატურამ კიდევ ერთხელ მიმართა სასამართლოს, რათა ნიკა მელიას გირაოს სახით 100 000 ლარი შეფარდებოდა, თუმცა სასამართლომ 40 000 ლარი განუსაზღვრა, რომელიც მან არ გადაიხადა.