Bloomberg-ის მონაცემებით, მსოფლიოში კორონავირუსის საწინააღმდეგო ვაქცინაცია 103 ქვეყანაში მიმდინარეობს და ამ დროისთვის უკვე 232 მილიონამდე ადამიანი აიცრა.
გამოცემის მიხედვით, მსოფლიოში ვაქცინაცია, ყოველდღიურად, საშუალოდ, 6.1 მილიონამდე ადამიანს უტარდება, ყველაზე მეტი – 70.4 მილიონი ვაქცინა აშშ-ში გაკეთდა.
მე-2 ადგილზე ჩინეთია, 40.5 მილიონი ვაქცინირებულით. ყველაზე სწრაფი ტემპით მოსახლეობის ვაქცინაცია ისრაელში მიმდინარეობს, სადაც უკვე 7.9 მილიონი ადამიანი აიცრა, რაც ყოველ 100 მოსახლეზე 87 ვაქცინირებულს ნიშნავს.
რაც შეეხება ევროპას, ბელგიის ერთ-ერთ ციხეში კარანტინი გამოცხადდა. მას შემდეგ, რაც დაკავებულთა ნახევარზე მეტს და ციხის თანამშრომლებს კორონავირუსი დაუდასტურდათ. ციხეში დაწესებული შეზღუდვების თანახმად, მათ საკნების დატოვებისა და შხაპის მიღების საშუალება არ ექნებათ, თუმცა ყოველდღიურად დაკავებულებს ცხელ საჭმელსა და ჰიგიენის ნივთებს მიაწვდიან.
შეზღუდვების გამო საპროტესტო აქციებია დუბლინში. სამართალდამცავებთან დაპირისპირებისას დაშავდა 3 პოლიციელი. ირლანდიის პოლიციის ცნობით, პოლიციელების მიმართულებით აქტივისტებმა ფოიერვერკები გაისროლეს.
ბოლო 24 საათში მსოფლიოს მასშტაბით, 400 000 ახალი ინფიცირების შემთხვევაა გამოვლენილი, COVID-19-ით დაიღუპა კიდევ 8 000 პაციენტი.