იუსტიციის მინისტრის თქმით, #18 პენიტენციური დაწესებულება მოშიმშილე პაციენტის ჯანმრთელობისთვის მზად არის. ამ თემაზე იუსტიციის მინისტრმა „იმედის კვირაში“ ისაუბრა. ის „მთავარი არხის“ გენერალური დირექტორის, ნიკა გვარამიას განცხადებასაც გამოეხმაურა და აღნიშნა, რომ პაციენტის ჯანმრთელობის მდგომარეობაზე ექიმებმა უნდა ისაუბრონ და არა ჟურნალისტებმა და იურისტებმა.
„დღეს ჩვენ მოვინახულეთ სპეციალური პენიტენციური სამსახურის #18 დაწესებულება ქალბატონ თამარ გაბუნიასთან ერთად. როგორც ექიმები გვეუბნებიან, ინფრასტრუქტურა არის სრულად მოწესრიგებული იმისთვის რომ მიიღოს პაციენტი და მართოს მოშიმშილე პაციენტის ჯანმრთელობა. რაც შეეხება დანარჩენ ინფორმაციას, რომელსაც ბატონი გვარამიას განცხადება შეიცავდა, ბუნებრივია, ეს გადამოწმდება იუსტიციის სამინისტროს გენერალურ ინსპექციასთან. ყველაზე მეტად, რა თქმა უნდა, ჩვენ ვართ დაინტერესებულები, რომ გავიგოთ სიმართლე. აუცილებლად გავიგებთ და მივაწვდით საზოგადოებას“, – განაცხადა ბრეგაძემ.
მან ასევე კიდევ ერთხელ აღნიშნა, რომ ექიმების ჯგუფთან შეხვედრაზე მიხეილ სააკაშვილის სამოქალაქო კლინიკაში გადაყვანაზე საუბარი არ ყოფილა.
ნიკა გვარამიას ცნობით, N18 სამკურნალო დაწესებულებაში მიხეილ სააკაშვილის უსაფრთხოების დაცვის მინიმალური გარანტია არ არსებობს და მისი ციხის საავადმყოფოში გადაყვანისას იმიტირებული ბუნტი იგეგმება, რომელიც მიხეილ სააკაშვილის ლიკვიდაციით დასრულდება. იუსტიციის სამინისტროს გენერალური ინსპექცია ნიკა გვარამიას მის მიერ გავრცელებულ ინფორმაციასთან დაკავშირებით გაესაუბრება.