მისი ნებისმიერი გადაადგილება არის მათთვის პროვოკაციის შესაძლებლობა და ამისთვის სჭირდებოდათ სასამართლოზე მოსვლა, თორემ ვნახეთ, სასმართლოზევე თქვა, რომ აღარც დაესწრება და არც აღიარებს სასამართლო პროცესს, – ამის შესახებ ვიცე-სპიკერმა არჩილ თალაკვაძემ მიხეილ სააკაშვილის სასამართლო პროცესზე საუბრისას განაცხადა.
„რაც შეეხება მის გამოსვლას, ამ გამოსვლიდან ჩვენ მარტივად გამოვიტანეთ დასკვნა. სააკაშვილმა თქვა, როდესაც ტყეს ჭრიან, ნაფოტებიც სცვივაო. ანუ, მე სახელმწიფოს ვაშენებდიო და იქ თუ ვინმე დაიღუპა, თუ ვინმე აწამეს და ვინმეს უფლებები დაირღვა, არ გამოვრიცხავ, რომ ეს მოხდაო და ამას დანაშაულად არ ვაღიარებო, ეს უბრალოდ გადაცდომები იყოო. საზოგადოებამ განსაჯოს, რამდენად შეიძლება, ამას გადაცდომა ეწოდოს, როდესაც ძალიან ბევრი ადამიანი დაიღუპა წამების და ძალადობის შედეგად, ბევრი ადამიანი გაუჩინარებული იყო, ბევრი ადამიანი პოლიტპატიმარი იყო, მედიაში რეიდები ტარდებოდა და საკუთრება ჩამორთმეული იყო. საზოგადოებამ უკვე მერვე არჩევნებში თავისი არჩევანი გააკეთა და თავისი პოზიცია დააფიქსირა. რეფორმები ადამიანის უფლებების დაცვითა და პატივისცემით უნდა გატარდეს“, – აღნიშნა არჩილ თალაკვაძემ.