ნატოს გენერალური მდივნის მოადგილემ, მირჩა ჯოანამ, ბერლინში, სადაც ნატო-ს საგარეო საქმეთა მინისტერიალი დაიწყო, უკრაინაში მიმდინარე ომზე, ასევე, შვედეთისა და ფინეთის ალიანში გაწევრიანების შესახებ ისაუბრა.
„განვიხილავთ რუსეთის უკრაინაში შეჭრას. მილიარდობით ევროს დახმარებით, სამხედრო მარაგების გადაცემით, ფინანსური, ჰუმანიტარული მხარდაჭერით, უკრაინელი ხალხის სიმამაცით, მათი თავდადებითა და ჩვენი დახმარებით, უკრაინამ ეს ომი უნდა მოიგოს. პუტინისთვის ასეთი გზავნილი გვაქვს – მათ დაიწყეს ყველაზე სასტიკი, ცინიკური ომი მეორე მსოფლიო ომის შემდეგ და პუტინი ალბათ განცვიფრებულია უკრაინელების თავდადებითა და საერთაშორისო საზოგადოების ერთიანობით. ჩვენ ვართ ძლიერი, ერთიანი და დავეხმარებით უკრაინას ამ ომის მოგებაში. რაც შეეხება ფინეთსა და შვედეთს – ჩვენ გვქონდა გუშინ საღამოს ამ თემაზე საუბარი. როგორც ყოველთვის, კონსტრუქციული და გულწრფელი მსჯელობაა. თურქეთი ნატოს მნიშვნელოვანი პარტნიორია. მათ დააფიქსირეს პოზიცია და ვიმსჯელეთ როგორც მოკავშირეებმა და მეგობრებმა. მე დარწმუნებული ვარ, რომ თუ ეს 2 ქვეყანა გადაწყვეტს ნატოში გაწევრიანებას, მაშინ ჩვენ შევძლებთ ნატოში მათ მივესალმოთ და კონსენსუსის მისაღწევად ყველა პირობას ვიპოვით“, – განაცხადა ნატოს გენმდივნის მოადგილემ.
გერმანიაში ნატოს წევრი ქვეყნების საგარეო საქმეთა მინისტრების შეხვედრა მიმდინარეობს. მინისტრებმა უკრაინისთვის მხარდაჭერასა და მადრიდის სამიტზე მისაღებ კონცეფციაზე უნდა იმსჯელონ. მინისტერიალის პირველ დღეს დიპლომატები შეხვდნენ კოლეგებს ფინეთიდან და შვედეთიდან. ფინეთი ალიანსის წევრობაზე აპლიკაციის წარდგენას ხვალ აპირებს.