საქართველოს პარლამენტის თავმჯდომარე, შალვა პაპუაშვილი აცხადებს, რომ მარტში, საქართველოს პრეზიდენტის საპარლამენტო მოსმენის თარიღი სალომე ზურაბიშვილმა ისე დაასახელა, რომ თარიღი საკანონმდებლო ორგანოსთან შეთანხმებული არ ყოფილა.
„ყველამ იცის, რომ თარიღი პარლამენტთან შეუთანხმებელი იყო. სწორედ ამიტომ, მაშინ ბიურომ მიიღო გადაწყვეტილება და სხდომა არ ჩანიშნა, რადგან წინასწარ შეთანხმებული თარიღი არ იყო“, – აცხადებს შალვა პაპუაშვილი.
მიმდინარე წლის მარტის დასაწყისში, სალომე ზურაბიშვილმა განაცხადა, რომ მზად იყო, დეპუტატების წინაშე მოხსენებით, 5 მარტს (შაბათი) წარმდგარიყო. მოგვიანებით, მმართველ გუნდში განმარტეს, რომ ვინაიდან შაბათი არასასესიო დღე იყო, ბიუროს სხდომაზე გადაწყვეყდნენ, როდის მოისმენენ პრეზიდენტისგან წლიურ ანგარიშს. საბოლოოდ, პრეზიდენტი პარლამენტში 14 მარტს წარდგა.
29 ივნისს, გადაცემაში „იმედი LIVE“, პარლამენტის წევრმა, სოზარ სუბარმა, სხვა საკითხებთან ერთად, საქართველოს პრეზიდენტზეც ისაუბრა – გაიხსენა თვითმფრინავის ეპიზოდი და ის, თუ როგორ ითხოვდა სალომე ზურაბიშვილი პარლამენტში სხდომის დანიშვნას ისე, რომ ეს პარლამენტთან შეთანხმებული არ იყო.