ჯანმრთელობის პრობლემების მიზეზით მიხეილ სააკაშვილმა დღეს, საგამოძიებო მოქმედებების ფარგლებში, ტოქსიკოლოგიური ექსპერტიზის ჩატარებაზე უარი განაცხადა, – ამის შესახებ სპეციალური საგამოძიებო სამსახურის გამომძიებელმა ვასილ კაკაშვილმა განაცხადა.
„ვიყავი შესული ბატონ მიხეილ სააკაშვილთან საგამოძიებო ნიმუშის აღების მიზნით. ჩვენ შევთავაზეთ მას ნიმუშის აღება, თუმცა, უარი განაცხადა მან დღეს საგამოძიებო მოქმედების ჩატარებაზე იმ მიზეზით, რომ მისი განმარტებით, ჯანმრთელობის პრობლემების გამო არ სურდა ნიმუშის აღება. მას საბოლოოდ ნიმუშის აღებაზე უარი არ უთქვამს, ამიტომ მომდევნო დღეებში ჩატარდება“,- აღნიშნა კაკაშვილმა.
ოჯახის წევრები ირწმუნებიან, რომ მიხეილ სააკაშვილის ჯანმრთელობის მდგომარეობა უკიდურესად მძიმეა. თუმცა „ვივამედის“ კლინიკური დირექტორის, ზურაბ ჩხაიძის განცხადებით, მიხეილ სააკაშვილი არ იმყოფება რეანიმაციულ განყოფილებაში, ვინაიდან მისი პარამეტრები რეანიმაციაში გადაყვანის მდგომარეობას არ შეესაბამება. მისივე თქმით, სააკაშვილი არ იკვებება სრულფასოვნად, იღებს მხოლოდ მისთვის სასურველ საკვებს მისთვის სასურველ დღეებში და „ეს არ ნიშნავს, რომ ვერ ჭამს, უფრო ალბათ არ ჭამს“.