აშშ-ის „რესპუბლიკურ პარტიაში“ უკრაინის დახმარების კრიტიკოსები აღიარებენ, რომ სენატში „რესპუბლიკელების“ ლიდერმა, მიტჩ მაკკონელმა გაიმარჯვა დებატების ამ რაუნდში, როდესაც აშშ-ის კონგრესმა უკრაინისათვის 61 მილიარდი დოლარის სამხედრო დახმარება დაამტკიცა, თუმცა აცხადებენ, რომ შემდგომში დახმარება აღარ იქნება. ინფორმაციას ამის შესახებ ამერიკული გამოცემა The Hill-ი ავრცელებს.
„თუ უკრაინა ფიქრობს, რომ აშშ-ის კონგრესისგან კიდევ მიიღებს 60 მილიარდ დოლარს, ეს არ მოხდება“, – განაცხადა „რესპუბლიკელმა“ სენატორმა, ჯეიმს დევიდ ვენსმა.
ეროვნული უსაფრთხოების საკითხებში აშშ-ის პრეზიდენტის მრჩეველმა, ჯეიკ სალივანმა ოთხშაბათს განაცხადა, რომ უკრაინის სამხედრო დახმარების ახალი პაკეტი წლის ბოლომდე გაგრძელდება. ეს ზრდის იმის შესაძლებლობას, რომ ახალი დაფინანსება შეიძლება საჭირო გახდეს 2025 წელს.
„ამან შესაძლოა უკრაინის რუსეთთან ომი და კიევისადმი აშშ-ის მხარდაჭერა აქციოს მთავარ საკითხად ბაიდენსა და ყოფილ პრეზიდენტ ტრამპს შორის საპრეზიდენტო რბოლაში“, – წერს გამოცემა The Hill-ი.
ამერიკელი ჟურნალისტების თქმით, უკრაინას მხარდაჭერა აქვს კონგრესის ორივე პალატაში, მაგრამ „რესპუბლიკური“ პარტიის მხარდაჭერა წარმომადგენელთა პალატაში მცირდება. „რესპუბლიკელების“ უმეტესობამ მხარი არ დაუჭირა უკრაინისათვის დახმარების გაზრდას, ზოგიერთი კონსერვატორი კი მაიკ ჯონსონის სპიკერის პოსტიდან მოხსნით იმუქრება. ამავე დროს, „რესპუბლიკელი“ სენატორების უმრავლესობამ მხარი დაუჭირა უკრაინისათვის დახმარების გამოყოფას.