დიდთოვლობამ სამეგრელო-ზემო სვანეთში პრობლემები შექმნა. რეგიონის სამხარეო ადმინისტრაციაში საგანგებო შტაბია შექმნილი, რომელსაც გუბერნატორი ლევან შონია ხელმძღვანელობს. შტაბის ინფორმაციით, პრობლემები ძირითადად გადაადგილების და ელექტრომომარაგების მიმართულებით შეიქმნა. თუმცა ამ დროსთვის ცენტრალური გზების დიდი ნაწილი უკვე გაწმენდილია, დარჩენილია მხოლოდ ჯვარი-მესტიის მონაკვეთი.
გუბერნატორის განცხადებით, ჯვარი-მესტიის მონაკვეთზე ზვავი ჩამოწვა და გაწმენდითი სამუშაოები ამის გამო შეფერხებულია. „ტექნიკა ინტენსიურად მუშაობს და ეს პრობლემაც მალე აღმოიფხვრება. პარალელურად რეგიონში მიმდინარეობს სკოლებთან მისასვლელი გზების გაწმენდა, იყრება ტექნიკური მარილი,“-განაცხადა ლევან შონიამ.
მისივე თქმით, რამდენიმე სოფელს არ მიეწოდება ელექტროენერგია. გუბერნატორის განცხადებით, ენერგო-პრო ჯორჯია 24-საათიან რეჟიმში მუშაობს და ელექტროენერიგიის მიწოდების აღდგენა უმოკლეს ვადებში მოხდება.