“მე მინდა გითხრათ, რომ როცა ახსენებთ, რომ კონსტიტუციურ პროექტს მხარი მხოლოდ ერთმა პარტიამ დაუჭირა, გავიწყდებათ, რომ ასევე არსებობენ დამოუკიდებელი დეპუტატები და ეს შეფასება ჩემი ამომრჩევლისთვის საკმაოდ შეურაცხმყოფელია, – მიმართა დამოუკიდებელმა მაჟორიტარმა დეპუტატმა, სალომე ზურაბიშვილმა პრეზიდენტის საპარლამენტო მდივან ანა დილიძეს პარლამენტში, პრეზიდენტის ვეტოს განხილვისას.
“მაქვს კითხვა, რაზეც მთელი ამ პერიოდის განმავლობაში პასუხი ვერ მივიღე. თქვენ აღნიშნეთ, რომ საზოგადოებას უნდა, თავისი პრეზიდენტი აირჩიოს და ამას რეიტინგები ადასტურებს. ამაში გეთანხმებით, რადგან მეც მათ შორის ვარ, ვინც პრეზიდენტის პირდაპირი არჩევნების მომხრეა, მაგრამ რომელი იურიდიული, პოლიტიკური, მორალური ლოგიკით შეიძლება საზოგადოებას უნდოდეს პრეზიდენტის პირდაპირი წესით არჩევა და არ უნდოდეს, თავისი დეპუტატის პირდაპირი არჩევა? – საზოგადოებას რომ ჰკითხოთ, მათი სურვილია, თავის დეპუტატთან ახლოს იყოს და უნდა გრძნობდეს, რომ მაჟორიტარი დეპუტატი ამომრჩევლის მიმართ ანგარიშვალდებულია. ეს ყველაფერი საქართველოს საზოგადოების მოთხოვნას წარმოადგენს, მაგრამ თქვენ პოლიტიკურად მხარს ერთს უჭერთ და მეორეს – არა“, – მიმართა დოლიძეს ზურაბიშვილმა.