თბილისის საერთაშორისო აეროპორტში გაურკვეველი ნივთიერებით მოწამლულმა შვიდივე პაციენტმა „სამედიცინო კორპორაცია ევექსის“ რეგიონული ჰოსპიტალი რამდენიმესაათიანი მკურნალობის შემდეგ დატოვა. ამის შესახებ ინფორმაციას სააგენტო „ინტერპრესნიუსი“ ავრცელებს.
ტოქსიკოლოგ ოთარ დიხამინჯიას განცხადებით, რა ნივთიერებამ გამოიწვია ინტოქსიკაცია, დაზარალებულებისთვის უცნობია. ექიმი-ტოქსიკოლოგის თქმით, მათ სიცოცხლეს საფრთხე არ ემუქრებათ. პაციენტებს რამდენიმე დღის შემდეგ გამოკვლევები კიდევ ჩაუტარდებათ.
„შვიდივე პაციენტმა თვითდინებით მომართა ჩვენს კლინიკას ტოქსიკოლოგთან კონსულტაციისთვის. მათგან ორს თვალის ლორწოვანი გარსის ანთება აღენიშნებოდა, ერთს კი თვალის ლორწოვანი გარსის ანთების გარდა კანზე ჰქონდა ერთი ბუშტუკოვანი გამონაყარი. ასევე, ამ პაციენტებს 2 ივლისს აღენიშნებოდათ თავბრუსხვევა, გულისრევა, თვალის ლორწოვანი გარსის გაღიზიანება. არც ერთის მდგომარეობა არ იყო კრიტიკული და არასტაბილური. შესაბამისად, შვიდივე მათგანი შესაბამისი რეკომენდაციის, გარკვეული გამოკვლევების ჩატარების შემდეგ ბინაზე გავწერე. ისინი ჩემთან მოვიდნენ 4 ივლისს, თუმცა გაურკვეველ ნივთიერებასთან შეხება 2 ივლისს ჰქონდათ“, – განაცხადა დიხამინჯიამ.