თემირლან მაჩალიკაშვილის მამა, მალხაზ მაჩალიკაშვილი ეჭვობს, რომ იმ გოგონას დაკითხვა მოხერხდეს, რომელსაც მისი შვილი შეტყობინებებს სწერდა.
„კვირა“ დაინტერესდა, იზიარებს თუ არა მალხაზ მაჩალიკაშვილი, გოგონას დაუყოვნებლივ დაკითხვასთან დაკავშირებით, მისი ინტერესების დამცველის, მარიამ კუბლაშვილის მოთხოვნას.
მალხაზ მაჩალიკაშვილი აცხადებს, რომ „ქისტებში სხვანაირი წესებია“ და აღნიშნულის გათვალისწინებით დაკითხვა, სავარაუდოდ, ვერ მოხერხდება. „აქ, ქისტებში რაღაც სხვანაირი მეთოდებია, წესებია და არამგონია“, – აღნიშნავს მალხაზ მაჩალიკაშვილი.
აღსანიშნავია, რომ მაჩალიკაშვილების ოჯახის ადვოკატი მარიამ კუბლაშვილი მისი დაცვის ქვეშ მყოფისგან განსხვავებით, იმ გოგონას დაუყოვნებლივ დაკითხვას ითხოვს, რომელსაც თემირლან მაჩალიკაშვილი მოკლე ტექსტურ შეტყობინებებს სწერდა.
„ჩემი მოთხოვნაა, რომ სასწრაფოდ დაიკითხოს ის ადამიანი, რომელიც ამ შეტყობინებებში ფიგურირებს, მისი სახელიც ცნობილია, მისი ნომერიც, ეს არის საქართველოში მცხოვრები ადამიანი“, – განაცხადა მარიამ კუბლაშვილმა.
მაჩალიკაშვილების ოჯახის ადვოკატი ამერიკის შეერთებული შტატების იუსტიციის სამინისტროს მიერ ჩატარებულ ინფორმაციულ ტექნიკურ ექსპერტიზას გუშინ პროკურატურაში გაეცნო. მისი თქმით, მოკლე ტექსტური შეტყობინებები თემირლან მაჩალიკაშვილის მიერ, მის შეყვარებულ გოგონასთან არის გაგზავნილი.
ამასთან, აღსანიშნავია, რომ მაჩალიკაშვილების ადვოკატმა, გუშინ, პროკურატურის დატოვების შემდეგ, თემირლან მაჩალიკაშვილის მიერ “ფეისბუქის” პირად გვერდზე გაზიარებულ იმ ვიდეომასალის ავთენტურობა დაადასტურა, რომელიც “ისლამური სახელმწიფოს” პროპაგანდას შეიცავს. მარიამ კუბლაშვილის თქმით, ეს თემირლანის მხრიდან, პანკისის ხეობიდან სირიაში წასული და გარდაცვლილი ადამიანების მიმართ, სამძიმრის გამოხატულება იყო. „ისინი რომ ცოცხლები და პანკისის ხეობისთვის უცნობი პირები ყოფილიყვნენ, მაგ შემთხვევაში კიდე სხვა კითხვები გაჩნდებოდა. მაგრამ თემირლანს, ძირითადად, იმ მოტივით აქვს გაზიარებული აღნიშნული ვიდეო, რომ იქ პანკისიდან წასული და შემდგომ გარდაცვლილი პირები ფიგურირებენ. დედამისმაც მითხრა, რომ ამ გარდაცვლილი ადამიანების ფოტოებს და ვიდეოებს მთელი ახალგაზრდობა იზიარებდა. ეს კი იმით აიხსნება, რომ ახალგაზრდები წუხან სირიაში უმოწყალოდ ბავშვების და ქალების მოკვლის ფაქტებზე და ფიქრობენ, რომ აქედან ადამიანები მათ დასახმარებლად მიდიან. ის, რომ თემირლანს გააზრებული ჰქონდა რომელი ორგანიზაციის წევრები იყვნენ ისინი, მე ამაზე არანაირი მტკიცებულება არ მაქვს”, – განაცხადა მარიამ კუბლაშვილმა.