ლომჯარია ხორავას ქუჩის მკვლელობის საქმეზე – ამ ეტაპზე რა ინფორმაციაც გვაქვს, სწორი მიმართულებით მიმდინარეობს გამოძიება

ამ ეტაპზე რა ინფორმაციაც გვაქვს, სწორი მიმართულებით მიმდინარეობს გამოძიება, – ამის შესახებ სახალხო დამცველმა ხორავას ქუჩაზე მომხდარი მკვლელობის საქმეზე საუბრისას ჟურნალისტებთან განაცხადა.
ნინო ლომჯარიას თქმით, სახალხო დამცველის აპარატი აკვირდება როგორც კომისიის მუშაობას, ასევე შსს-ში მიმდინარე გამოძიებას.
“ჩვენ თვალს ვადევნებთ, როგორც საგამოძიებო კომისიის საქმიანობას, ასევე შინაგან საქმეთა სამინისტროში მიმდინარე გამოძიებას. რა თქმა უნდა ველოდებით, რომ გარკვეული წინსვლა უნდა იყოს. ამ ეტაპზე დამატებით ინფორმაციას ვერ მოგაწვდით, თუმცა ვფიქრობთ, რომ ამ ეტაპზე რა ინფორმაციაც გვაქვს, სწორი მიმართულებით მიმდინარეობს გამოძიება და იმედს ვიტოვებთ, რომ პროგრესი იქნება.
თუ დავინახეთ, რომ არასწორი მიმართულებით მიმდინარეობს გამოძიება ან ადგილი აქვს კვლავ მთელი რიგი საგამოძიებო მოქმედებების ჩაუტარებლობას, ამის შესახებ ჩვენ აუცილებლად მივაწვდით ინფორმაციას საზოგადოებას“, – განაცხადა ნინო ლომჯარიამ.