ხორავას ქუჩის საქმეზე, ცრუ ჩვენების მიცემისთვის დაკავებულ არასრულწლოვანს ბრალს, სავარაუდოდ, დღეს წარუდგენენ.
ადვოკატი გოჩა კვარაცხელია მოზარდს უკვე შეხვდა. თუმცა, აღიარებს თუ არა ბრალს მისი დაცვის ქვეშ მყოფი, ამ თემაზე კვარაცხელია მედიასთან ჯერ არაფერს ამბობს. მოზარდი თბილისის მთავარ სამმართველოშია. მას ადვოკატი დღეს, 11:00 საათზე შეხვდება.
ხორავა ქუჩაზე მოზარდების მკვლელობის საქმეზე 19 ივლისს კიდევ ერთი მოზარდი დააკავეს. გამოძიებით დადგინდა, რომ არასრულწლოვანმა, რომელიც უშუალოდ შეესწრო განსაკუთრებით მძიმე დანაშაულის ჩადენის ფაქტს, განზრახ არასწორი ინფორმაცია მიაწოდა სასამართლოს და მისცა ცრუ ჩვენება.
დაკავებული არასრულწლოვნის დედა ამბობს, რომ მისი შვილი უდანაშაულოა.
არსებული ინფორმაციით, დ.ღ. მე-11 კლასის მოსწავლეა და ეს სწორედ ის პირია, რომელმაც სკოლის საპირფარეშოში კონფლიქტი დაიწყო.
ხორავას ქუჩაზე მოზარდების მკვლელობის საქმეზე გამოძიებას ხელახლა აწარმოებს შინაგან საქმეთა სამინისტრო. სასამართლოს პარალელურად, დროებითმა საპარლამენტო საგამოძიებო კომისიამ 17 ივლისს არასრულწლოვანი მოწმე გამოკითხა. მოწმეთა დაკითხვა გრძელდება.
12 ივლისს ცნობილი გახდა, რომ დროებითი საგამოძიებო საპარლამენტო კომისია ხორავას ქუჩის საქმის გამოძიების ფარგლებში გამოკითხვების დასრულებას ივლისის ბოლოს გეგმავს, დასკვნის გამოქვეყნებას კი, აგვისტოს ბოლოს ან სექტემბრის დასაწყისში.
ხორავას ქუჩაზე ორი არასრულწლოვანი დავით სარალიძე და ლევან დადუნაშვილი 2017 წლის 1 დეკემბერს დაჭრეს. ერთი მოზარდი საავადმყოფოში მიყვანამდე გარდაიცვალა. მეორე – მრავლობითი დაზიანებებით საავადმყოფოში მოთავსებიდან მეორე დღეს, 2 დეკემბერს გარდაიცვალა.