ხორავას ქუჩაზე მოკლული ერთ-ერთი მოზარდის, ლევან დადუნაშვილის მკვლელობაში ბრალდებულმა არასრულწლოვანმა გ.ბ-მ საქმეზე შექმნილ დროებით საგამოძიებო კომისიას ჩვენება მისცა. როგორც ბრალდებულის ადვოკატმა ინგა შარაშენიძემ თქვა, გ.ბ-მ კომისიას მისი პოლიციაში წაყვანის თაობაზე გამოძიების დაწყების თხოვნით მიმართა.
“ბრალდებულმა მოითხოვა, რომ დაიწყონ გამოძიება ერთ-ერთ დეტალზე. საუბარია მის წაყვანას პოლიციაში და კანონიერი წარმომადგენლის და ადვოკატის გარეშე ყოფნას. მასზე ზეწოლა განხორციელდა. ის არ ყოფილა ქალაქის მთავარ სამმართველოში, არამედ როგორც ბრალდებული აცხადებს, იყო ძველი თბილისის სამმართველოში”, – თქვა ადვოკატმა და დასძინა, რომ არასრულწლოვანი ბრალდებული დაახლოებით სამი საათის განმავლობაში მარტო ჰყავდათ დაკავებული, სადაც მასზე ფსიქოლოგიური ზეწოლა მიმდინარეობდა.
31 ივლისს ხორავას ქუჩაზე მოზარდების მკვლელობის საქმეზე საგამოძიებო კომისიის წევრებმა გლდანის ციხეში მსჯავრდებული არასრულწლოვნები გამოკითხეს.
გ.ჯ-ს პირველი ინსტანციის სასამართლოს მიერ დავით სარალიძის მკვლელობის მცდელობის ნაწილში გამამტყუნებელი განაჩენი აქვს გამოტანილი. ხოლო მეორე არასრულწლოვანი – გ.ბ სასამართლომ ლევან დადუნაშვილის მკვლელობაში დამნაშავედ ცნო.
ამასთან, მომდევნო კვირის ბოლოს კომისია შინაგან საქმეთა მინისტრ გიორგი გახარიას, ყოფილი მთავარი პროკურორის, ირაკლი შოთაძის, ასევე, იუსტიციის მინისტრ თეა წულუკიანის გამოკითხვას გეგმავს.