ჩვენ ველოდებით კომისიის დასკვნას. მე დღეს ცოტათი უფრო მეტს მოველოდი, – ამის შესახებ ხორავას ქუჩაზე მკვლელობის საქმის შემსწავლელი დროებითი საგამოძიებო კომისიის სხდომის შემდეგ შინაგან საქმეთა მინისტრმა, გიორგი გახარიამ განაცხადა.
როგორც გიორგი გახარიამ ჟურნალისტებს კომისიის სხდომაზე მისი გამოკითხვის შემდეგ განუცხადა, საქმეზე გამოძიება გრძელდება და ამ ტრაგიკული საქმის ფარგლებში ყველა კითხვას გაეცემა პასუხი.
„ჩვენ არ მოვსულვართ ოპოზიციურ პარტიასთან, არამედ მოვედით კომისიასთან. ხაზგასმით მინდა აღვნიშნო და მოქალაქეებს მინდა ვუთხრა – გამოძიება გრძელდება და ეს არის პროცესი. სასამართლოში გრძელდება გამოძიების ძირითადი ნაწილი, რომელიც ახლა მეორე ინსტანციაშია, გამოყოფილი საქმე გრძელდება და ჩვენ ერთმნიშვნელოვნად ვამბობთ, რომ ამ ტრაგიკული საქმის ფარგლებში ყველა კითხვას გაეცემა პასუხი. რა თქმა უნდა ჩვენ გვესმის, რომ ვცხოვრობთ საპარლამენტო რესპუბლიკაში და საპარლამენტო კონტროლის მნიშვნელობა, ჩვენთვის კრიტიკულად მნიშვნელოვანია. სწორედ ამიტომ ვართ დღეს აქ და ამიტომ გავეცით ყველა კითხვაზე პასუხი, რომელიც იყო და ასე გავაგრძელებთ, რადგან ყველას კარგად გვესმის, რომ საპარლამენტო საგამოძიებო კომისია შეიქმნა იმის დასადგენად, რომ გამოძიების პროცესში, რომელიც ჯერ არ დასრულებულა, იყო რაიმე ხარვეზები თუ არა და შესაბამისად ეს არის კომისიის ფუნქცია. მე დღეს კომისიას ვუთხარი, რომ თუ კომისია გამოავლენს, ისეთ ხარვეზებს, რომელსაც პირდაპირი მიზეზ-შედეგობრივი ზეგავლენა ჰქონდა ამ საქმის საბოლოო შედეგზე, რა თქმა უნდა ჩვენ, შსს მივიღებთ შესაბამის გადაწყვეტილებას. ის საგამოძიებო მოქმედებები, რომელიც ჩამოთვალეს დღეს, კომისიას არ აქვს დადგენილი, არის თუ არა პირდაპირ კავშირში საბოლოო შედეგთან. მე ვფიქრობ, რომ არ აქვს კავშირი. თუ კომისია დაადგენს, რომ ასეთი კავშირი იყო, რა თქმა უნდა ეს ჩვენთვის იქნება მთავარი. ჩვენ ველოდებით კომისიის დასკვნას. მე დღეს ცოტათი უფრო მეტს მოველოდი“, – განაცხადა შს მინისტრმა.