მასწავლებლის სახლის და შეფასებისა და გამოცდების ეროვნული ცენტრის ახალი ხელმძღვანელების ვინაობა ცნობილია. ამის შესახებ ინფორმაციას edu.aris.ge ავრცელებს.
ედუ.არის. გე-ის ინფორმაციით, შეფასებისა და გამოცდების ეროვნულ ცენტრს, მაია მიმინოშვილის ნაცვლად სოფო გორგოძე უხელმძღვანელებს, „მასწავლებლის სახლში“ კი გიორგი მაჩაბელს ბერიკა შუკაკიძე შეცვლის, რომელიც ამ პოსტზე უკვე დანიშნულია.
კონკურსი დასრულებულია და გადაწყვეტილება თითქმის მიღებულია განათლების ხარისხის განვითარების ცენტრის ახალი ხელმძღვანელის პოსტზეც, თუმცა კონკრეტული პირის სახელი და გვარი ჯერჯერობით უცნობია.
edu.aris.ge-მ საკითხის გადამოწმება თავად განათლებისა და მეცნიერების სამინისტროში და ასევე “ნაეკში” სცადა, თუმცა უწყებებში ინფორმაცია არც უარყვეს და არც დაადასტურეს.
განათლების მინისტრმა ოთხი მაღალჩინოსანი – თემურ მურღულია, ლია გიგაური, მაია მიმინოშვილი და თამარ სანიკიძე 10 სექტემბერს თანამდებობიდან გაათავისუფლა.
გამოცდების ეროვნული ცენტრის ყოფილმა ხელმძღვანელმა, მაია მიმინოშვილმა Facebook-ის საკუთარ გვერდზე დაწერა, რომ განათლების მინისტრთან, მიხეილ ბატიაშვილთან არანაირი უთანხმოება არ ჰქონია, რადგან მათ ერთად არასდროს უმუშავიათ.