ოკუპირებული ცხინვალიდან მაია ოთინაშვილის და აკაკი დოთიაშვილის გათავისუფლებაში ქართველი და ოსი მოჭიდავეებიც მონაწილეობდნენ. „რა თქმა უნდა, სახელმწიფოსთან ერთად ჩვენი მეგობრები, მოჭიდავეები გვერდში დაგვიდგნენ და დღეს ორი ადამიანი ოჯახშია, კარგად არის და ჯანმრთელადაა“ – განუცხადა ჟურნალისტებს ჟურნალისტებს ჭიდაობის ფედერაციის პრეზიდენტმა გეგეშიძემ, რომელიც სოფელ ხურვალეთში, მაია ოთინაშვილის ოჯახში იმყოფებოდა. გეგა გეგეშიძის ინფორმაციით, გათავისუფლების პროცესში ბუნებრივია, ჩართული იყო სახელმწიფო, მაგრამ მოჭიდავეებიც, როგორც ქვეყნის სამსახურში მყოფი ჯარისკაცები, ეცადნენ საქართველოს მოქალაქეების მშვიდობიანად გათავისუფლებას ოსი მეგობრების დახმარებით. „მეგობრობით კეთდება ყველა კარგი საქმე და ჩვენ ვეცდებით, რომ ეს მეგობრობა არ გავწყვიტოთ და უფრო მეტი კარგი საქმე გავაკეთოთ ქვეყნისთვისაც“ – განაცხადა გეგა გეგეშიძემ. მისი თქმით, მოჭიდავეებს სხვანაირი მეგობრობა აქვთ და როცა მეგობარს დაურეკავ, იქ მოლაპარაკება საჭირო აღარ არის.
სპორტსმენების უშუალო ჩართულობა დაადასტურა და მათ მადლობა გადაუხადა საქართველოს სახელმწიფო უსაფრთხოების სამსახურის წარმომადგენელმა, თამთა გოგუაძემ.