მედიაგამოცემა “ტაბულა”-ს დამფუძნებელი თამარ ჩერგოლეიშვილი სამოქალაქო აქტივისტების მიერ, იური მეჩითოვის სახლთან გამართულ აქციას ეხმიანება და მიიჩნევს, რომ პირად სივრცეში შეჭრა და მსგავსი პროტესტის გამოხატვა მიუღებელია, რადგან მას ჰყავს ოჯახის წევრები.
“ძალიან, ძალიან ცუდი ტონი და საქციელია ადამიანის სახლში მივარდნა და ასე მოქცევა – ამ ადამიანს ყავს ოჯახის წევრები, რომლებსაც ნამდვილად არ ეკისრებათ პასუხისმგებლობა მეჩითოვის სიტყვების გამო.
არაფრით განსხვავდება ამის ჩამდენი ლადო სადღობელაშვილისგან და ქართული მარშის სხვა წევრებისგან, რომლებიც ორი წლის წინ ჩემს სახლს აჭრელებდნენ “ბოკერია მკვლელია” წარწერებით და ჩემი 10 წლის შვილი უყურებდა.
საჯარო სივრცეში დარჩით და იქ შეავიწროვეთ – სახლში და პირად სივრცეში რას უვარდებით? სად გაიზარდეთ?”– წერს თამარ ჩერგოლეიშვილი.
აქტივისტებმა ფოტოგრაფ იური მეჩითოვის სახლის კარებზე 9 აპრილს დაღუპულთა გვარები გააკრეს, ასევე გააკრეს ვლადიმერ პუტინის ფოტო და ამ ფორმით გააპროტესტეს მისი ნათქვამი იმის შესახებ, რომ 1989 წლის 9 აპრილს შეკრებული ადამიანები არა რუსი სამხედროების მიერ იქნენ მოკლულები, არამედ სუნთქვის უკმარისობით დაიღუპნენ.