ფინანსთა მინისტრი ივანე მაჭავარიანი აცხადებს, რომ ვერ დასახელდება ვერც მცირე, მიკრო თუ მსხვილი ბიზნესი, რომელიც ამ ხელისუფლების მხრიდან რაიმე სახისტერორის ქვეშ ყოფილიყო. ამის შესახებ მან საზოგადოებრივ მაუწყებელთან ინტერვიუში განაცხადა.
ფინანსთა მინისტრის თქმით, ვინმეზე ზეწოლის მოხდენა ამ ხელისუფლების “ბუნება არ არის”.
“ჩვენი ხელისუფლება არ არის იდეალური და მეეჭვება სადმე არსებობდეს რომელიმე ქვეყანაში, ჩვენ მიმართ შეიძლება იყოს პრეტენზია, რომ შედარებით ნელი ვართ გადაწყვეტილებების მიღებაში, ვფრთხილობთ და დემოკრატიის პირობებში, ეს ყველა ხელისუფლებას ახასიათებს და ცოტა აქვეითებს ეფექტურობას ეს ასეა, მაგრამ სხვა ყველა დანარჩენი მართვის მოდელი ჩემზე კარგად იცით, რომ უარესია. ის, რომ ხელისუფლება ძალადობს, ბიზნესს ართმევს ქონებას, სძალავს ფულს ამის დაჯერება ხომ შეუძლებელია? გეთანხმებით, რომ ძალიან მნიშვნელოვანია მედია. ჩვენი ეს საუბარიც მნიშვნელოვანია, მაგრამ ახლა, რაც არ უნდა ერთმანეთს ვუმტკიცოთ, რომ ჩვენ ვატერორებთ ბიზნესს, ხომ არავინ არ დაიჯერებს, რადგან თვითონ ხომ კარგად იციან ბიზნესმენებმა? ეს ქვეყანა ხომ იცით რა პატარაა? ხომ იცით, რომ არაფორმალურ კომუნიკაციას ძალიან დიდი მნიშვნელობა აქვს? რამდენიც არ უნდა მოგატყუოთ, თუ პირიქითაა, ხომ გაიგებთ ამას თუნდაც თქვენი მეზობლისგან, ან ნათესავისგან? ამიტომ არაა საჭირო ღია კარის მტვრევა. რაც არ არსებობს, იმაზე ნუ გვაკრიტიკებთ”, – განაცხადა ფინანსთა მინისტრმა ივანე მაჭავარიანმა.