ინაუგურაციამდე ორი დღით ადრე ბოლო დეტალები ზუსტდება. ღონისძიებისთვის რამდენიმე სივრცე მოეწყობა, მათ შორის ფიცის დადების ადგილი. როგორც ორგანიზატორები ამბობენ, რომ უამინდობას ხელი არ შეუშლია და 16 დეკემბრისთვის ყველაფერი მზად იქნება.
არჩეული პრეზიდენტის ინაუგურაციის საორგანიზაციო ჯგუფის წევრები, მათ შორის რეჟისორი ბასა ფოცხიშვილი დღეს თელავში მიმდინარე სამზადისს ადგილზე გაეცნობა.
ერეკლე მეფის სასახლის ტერიტორიაზე რამდენიმე დღეა ინაუგურაციის მოსამზადებელი სამუშაოები მიმდინარეობს. ამ დროისთვის ტრიბუნის და სცენის მოწყობა თითქმის დასრულებულია.
თელავის ქუჩებში საქართველოს სახელმწიფო დროშებია გამოფენილი.
ინაუგურაციასთან დაკავშირებით, 14,15 და 16 დეკემბერს 13:00 საათიდან 15:00 საათამდე ქვემეხებიდან ერთობლივად გაისვრიან.
„გავეცანი ზოგ დეტალებს. კიდევ არის რაღაცები დასაზუსტებელი…. ადგილზე იქნება რეპეტიციები ყველაფრის და მე მგონი, გავდივარ ბოლოსკენ. ცხადია, ახლა ამ დეტალებს არ გაგაცნობთ. ეს იქნება, პირველ რიგში, რამდენადაც შევძელით სისადავე,“ – ამბობს სალომე ზურაბიშილი.