გუდაურში, ბაკურიანში, ზემო აჭარასა და სვანეთში გვყავს ახლად ეკიპირებული პატრულის შემადგენლობა, 82 ადამიანი, – ამის შესახებ პრემიერ-მინისტრმა მამუკა ბახტაძე გუდაურში ზამთრის სეზონის გახსნაზე სიტყვით გამოსვლისას განაცხადა, სადაც მან პატრულის თანამშრომლებს მადლობა გადაუხადა.
„ჩვენ გავითვალისწინეთ წარსული წლების გამოცდილება. წელს, პატრულში დასაქმებულ მოქალაქეებს ტრენინგი ჩაუტარდათ და საქართველოს ზამთრის ყველა კურორტზე – გუდაურში, ბაკურიანში, ზემო აჭარასა და სვანეთში გვყავს ახლად ეკიპირებული პატრულის შემადგენლობა- 82 ადამიანი. მინდა, მათ განსაკუთრებით მივესალმო და მადლობა გადავუხადო. წელს, გუდაურის კურორტს 30 წელი შეუსრულდა. 30 წლის წინ, როდესაც დაიწყო ამ კურორტის განვითარება, მთავარი გზავნილი იყო, რომ საქართველოს ზამთრის კურორტები უნდა ყოფილიყო მსოფლიოში საუკეთესო. ჩვენ ღირსეულად უნდა გავაგრძელოთ ამ გზავნილის რეალურ ცხოვრებაში განხორციელება და დარწმუნებული ვარ, მსგავსი ინფრასტრუქტურული პროექტების მეშვეობით საქართველო მართლა დაიკვიდრებს მსოფლიო რუკაზე ადგილს“, – განაცხადა ბახტაძემ.