მიხეილ სააკაშვილმა Facebook-ზე პირდაპირი ეთერის დროს თელავში მიმდინარე ინაუგურაცია შეაფასა, ამასთან ილაპარაკა ნაციონალური მოძრაობის მხარდამჭერების აქციის შესახებ და თქვა, რომ დღევანდელმა დღემ მას 2003 წელი და ის კადრები გაახსენა, თუ როგორ კეტავდნენ კახეთიდან თბილისში მიმავალ გზას “კორუმპირებული და თავზეხელაღებული ე.წ. პოლიციელები”.
ამასთან, სააკაშვილმა საზოგადოებას მოუწოდა, რომ დღეს საღამოს თბილისში, რუსთაველის გამზირზე აქციის გასამართად შეიკრიბოს. მან ხელისუფლება კიდევ ერთხელ დაადანაშაულა არჩევნების გაყალბებაში და თქვა, რომ “საქართველო არ არის მუგაბესდროინდელი ზიმბაბვე. საქართველო არ არის ის, რისი გადაქცევად ივანიშვილს უნდა. ჩვენ არ ვართ 70-იანი წლების უგანდა, გასული საუკუნის შუა პერიოდის ლათინური ამერიკა, არ ვართ საბჭოთა კავშირში, არ ვართ თურქმენეთი, რომლის წარმომადგენელიც ამ ინაუგურაციაზე ჩამოვიდა”, – თქვა მიხეილ სააკაშვილმა.
დღეს ნაციონალური მოძრაობის საპროტესტო აქციები გაიმართა. განსაკუთრებით ვითარება კახეთში, კერძოდ თელავსა და ველიცხიესთან დაიძაბა.
სამართალდამცველებს ნაციონალური მოძრაობის ლიდერებისა და აგრესიულად განწყობილი მხარდამჭერების მოგერიება გურჯაანში უწევთ, მათ თელავშიც დაუპირისპირდნენ.
ვითარება მას შემდეგ გამწვავდა, რაც აქციის მონაწილეებმა გზის გადაკეტვა მოინდომეს, რის საშუალებასაც პოლიცია არ აძლევდათ. გზის გადაკეტვის სურვილი კი მას შემდეგ გაუჩნდათ, როცა ინაუგურაციიდან წამოსული სტუმრების ავტომობილები დაინახეს.
შეხლა-შემოხლისას ქართული ოცნების წარმომადგენლებს ავტომანქანა დაუზიანეს. ამ მანქანაში დეპუტატები თამარ ხულორდავა და სოფიო ქაცარავა ისხდნენ. ავტომობილის წინა საქარე მინა სრულიად დამსხვრეულია.