საქართველოს ახალი პრეზიდენტის ინაუგურაციას მსოფლიო მედია ეხმაურება. ინაუგურაციასა და ცერემონიის პარალელურად განვითარებულ მოვლენებზე წერს გავლენიანი Washington Post-ი, ტელეკომპანია ABC-ი, DW, ბრიტანული საზოგადოებრივი მაუწყებლის რუსული ბიურო, ასევე რუსული სააგენტოები.
„საქართველოს პირველი ქალი პრეზიდენტის ინაუგურაცია პროტესტის ფონზე წარიმართა“- ამ სათაურით სტატიას Washington Post-ი აქვეყნებს და წერს, რომ ახალმა პრეზიდენტმა სიტყვით გამოსვლისას ერთ-ერთი მთავარი აქცენტი საქართველოს ევროკავშირსა და ნატოში ინტეგრაციის პროცესზე გააკეთა. DW კი აღნიშნავს, რომ ზურაბიშვილის მიერ ფიცის დადებისთანავე ქვეყანაში ახალი კონსტიტუცია ამოქმედდა.
გერმანული მედია ყურადღებას ზურაბიშვილის სიტყვით გამოსვლაზე ამახვილებს და წერს, რომ ახალი პრეზიდენტისთვის საქართველოს ევროსტრუქტურებში გაწევრიანება შეუქცევადი პროცესია. ინაუგურაციასა და საქართველოში არჩევნების შემდგომ განვითარებულ მოვლენებზე წერს BBC-ის რუსული ბიუროც.
ბრიტანული საზოგადოებრივი მაუწყებელი ყურადღებას ამახვილებს ოპოზიციის აქციებზე და აღნიშნავს, რომ ნაციონალურმა მოძრაობამ და მისმა მხარდამჭერებმა, რომლებიც არჩევნების შედეგებს არ ეთანხმებიან, პროტესტის ნიშნად საქართველოს პარლამენტის წინ კარვები გაშალეს. ზურაბიშვილის ინაუგურაციას ეხმაურებიან რუსული მედიაშიც. ისინი ზურაბიშვილის სიტყვის იმ ნაწილზე ამახვილებენ ყურადღებას, რომელშიც ახალმა პრეზიდენტმა რუსეთთან ურთიერთობაზე ილაპარაკა.
გამოცემა ზურაბიშვილის სიტყვების ციტირებს და წერს, რომ საქართველოს ახალი პრეზიდენტი რუსეთთან ურთიერთობის ნორმალიზების ერთ-ერთ მთავარ პირობად, მოსკოვის მიერ საერთაშორისო ნორმების შესრულებას ასახელებს.
სალომე ზურაბიშვილის საინაუგურაციო სიტყვა სრულად შეგიძლიათ იხილოთ ბმულზე.