პარლამენტის პირველი ვიცე-სპიკერის, თამარ ჩუგოშვილის განცხადებით, პირველი შემთხვევაა, როცა კონგრესმა საქართველოს მხარდამჭერი აქტი დაამტკიცა.
როგორც ჟურნალისტებს ჩუგოშვილმა განუცხადა, კონგრესს მხარდამჭერი განცხადებები ბევრჯერ გაუკეთებია და საკანონმდებლო აქტებში საქართველოს შესახებ ჩანაწერი დაუფიქსირებია, მაგრამ ეს პირველი შემთხვევაა, როცა კანონი მიღებულია საქართველოს მხარდაჭერის თაობაზე.
„ეს გამოხატულებაა მნიშვნელოვანი პოლიტიკური გზავნილების, რაც მთავარი პარტნიორის მხრიდან ძალიან გვჭირდება. მთავარი აქცენტები საქართველოს ტერიტორიულ მთლიანობას, ოკუპირებულ ტერიტორიებზე არსებულ ვითარებას შეეხება. მხარდაჭერილია „ოთხოზორია-ტატუნაშვილის“ სია. ასევე განსაკუთრებული აქცენტებია გაკეთებული იმაზე, რომ მომავალი წლების განმავლობაში, ამერიკამ მხარი ქართული არმიის გაძლიერებას უნდა დაუჭიროს. ჩვენი ქვეყნისთვის ყველა ეს მიმართულება სასიცოცხლოდ მნიშვნელოვანია. მნიშვნელოვანია, როცა ორპარტიულად, „რესპუბლიკელები“ და „დემოკრატები“ საქართველოს მიმართ ერთსულოვნებას გამოხატავენ“, – განაცხადა ჩუგოშვილმა.