თბილისის მერმა კახა კალაძემ დედაქალაქის საკრებულოს მერიის ერთი წლის საქმიანობის ანგარიში გააცნო.
კალაძემ ანგარიშის წარდგენისას ყურადღება გაამახვილა როგორც განხორციელებულ პროექტებზე, ასევე სამომავლო გეგმებზე.
დედაქალაქის მერმა ისაუბრა საზოგადოებრივი ტრანსპორტის განვითარების საჭიროებაზე და აღნიშნა, რომ ეკოტრანსპორტი, მწვანე პოლიტიკა მერიის პრიორიტეტია. მისივე თქმით, 2019 წლის ბოლოსთვის მერიას ავტობუსების შესყიდვა დასრულებული ექნება. მისივე ინფორმაციით, შეძენილია 10 მეტრიანი MAN-ის ფირმის ავტობუსი, რომელიც დედაქალაქში თებერვლიდან შემოვა.
ასევე, კალაძის თქმით, 220 ავტობუსზე ტენდერი დასრულებულია და ხელშეკრულება გაფორმდება. მისივე ინფორმაციით, 2019 წელს, თბილისს 150 გაზზე და 90 ელექტროენერგიაზე მომუშავე ავტობუსი ეყოლება, ხოლო 18- მეტრიანი ავტობუსები დედაქალაქში 2020 წლიდან შემოვა.
ასევე კალაძემ ყურადღება გაამახვილა ტაქსების რეფორმაზე, რომელიც 2018 წელს დაიწყო და 2019 წელსაც გაგრძელდება. დედაქალაქის მერის თქმით, იგეგმება მეტროს ახალი შემადგენლობების დამატება, რაც მოცდის დროს შეამცირებს.
რაც შეეხება სხვა საკითხებს, როგორც კალაძემ აღნიშნა, 2018 წლის განმავლობაში 224 ავტოფარეხია აღებული თბილისში და ეს პროცესი გრძელდება.
ასევე, მისივე ინფორმაციით, მუნიციპალური ნარჩენების მართვის სტრატეგია შემუშავდა და სეპარირებული ურნების შეძენა დაიწყო, რაც ორბელიანის და გუდიაშვილის მოედნებზე განთავსდება.
მერიის ინფორმაციით, ინფრასტრუქტურული პროექტების განხორციელება მომავალ წელსაც გაგრძელდება. კალაძის თქმით, ბიუჯეტის 38 % ინფრასტრუქტურაზე დაიხარჯება, ხოლო 35% ჯანდაცვასა და სოციალურ მიმართულებაზე, რაც 20 მილიონი ლარით არის გაზრდილი.
შეგახსენებთ, რომ დედაქალაქის საკრებულომ დღეს თბილისის მთავრობის ბიუჯეტი უნდა დაამტკიცოს. მერიის ინფორმაციით, 2019 წლის ბიუჯეტის პროექტის მთლიანი მოცულობა 927, 6 მლნ ლარით განისაზღვრა, რაც გასული წლის თავდაპირველად დამტკიცებულ ბიუჯეტთან შედარებით (861,6 მლნ) 66 მლნ ლარით არის გაზრდილი, ხოლო 2018 წლის დაზუსტებულ ბიუჯეტთან შედარებით გაზრდილია 10, 8 მლნ ლარით.