პრემიერ-მინისტრის, მამუკა ბახტაძის განცხადებით, ხელისუფლებას ამბიციური გეგმა აქვს, რომ განათლების სფეროს სრული ტრანსფორმაცია მოახდინოს და მსოფლიოში ერთ-ერთი გამორჩეული ქართული სკოლა დააფუძნოს.
დღეს გამართულ პრესკონფერენციაზე მამუკა ბახტაძემ განათლების სისტემასა და ამ მიმართულებით მთავრობის მიერ მომზადებულ ინიციატივაზე ისაუბრა.
„გუშინ, საზოგადოებას განათლების კონცეფციასთან დაკავშირებით ჩვენი პოლიტიკური გუნდის ხედვა წარვუდგინეთ, მაგრამ ეს მხოლოდ განათლების კონცეფცია არ არის, ეს არის ხედვა იმის, თუ როგორ უნდა მოახერხოს, საქართველომ ის გამოწვევები დაძლიოს, რომელიც ქვეყნის წინაშე გვაქვს. უფრო მეტიც, გუშინაც განვაცხადე, რომ პირადად ჩემთვის სწორედ ეს იდეა გახლავთ მთავარი მოტივაცია, საჯარო პოლიტიკაში რატომაც ვარ. ჩვენ ამბიციური გეგმა გვაქვს, რომ განათლების სფეროს სრული ტრანსფორმაცია მოვახდინოთ და მსოფლიოში ერთ-ერთი გამორჩეული განათლების სკოლა, ამ შემთხვევაში, ქართული სკოლა დავაფუძნოთ. განვითარებული ქვეყნების პრაქტიკა გვიჩვენებს, რომ თუ ქვეყნის ეკონომიკაში განათლების სფეროს ორნიშნა ციფრი არ აქვს, ანუ, მთლიან შიდა პროდუქტში მინიმუმ 10-11 პროცენტი არ არის, 21-ე საუკუნეში ასეთ ერებს საერთაშორისო ბაზრებზე კონკურენცია ძალიან უჭირთ, რადგან ადამიანური კაპიტალის სწორი განვითარება ვერ ხდება. სწორედ ეს არის ჩვენი ორიენტირიც, რომ აღნიშნული იდეის რეალიზაციის შემდეგ, განათლების სექტორი ჩვენს ეკონომიკაში დომინანტი გახდეს. ის მინიმუმ ორნიშნა ციფრი 10-11 პროცენტი უნდა იყოს ჩვენი მთლიანი შიდა პროდუქტის“, – განაცხადა ბახტაძემ.
პრემიერ-მინისტრმა განათლების სექტორის სახელმწიფო დაფინანსებაზეც გაამახვილა ყურადღება.
„2012 წელს განათლების სექტორი ჩავიბარეთ, სადაც ბიუჯეტი 700 მილიონ ლარსაც კი ვერ აღწევდა. 2019 წლის ბიუჯეტის მიხედვით, განათლების სექტორზე დაახლოებით ერთი მილიარდ 600 მილიონი გავითვალისწინეთ, 2020 წელს ის 2 მილიარდი გახდება, 2021 – 2,5 მილიარდი ლარი იქნება, ხოლო ჩვენი ინიციატივის შედეგად, 2022 წელს მთლიანი შიდა პროდუქტის 6 პროცენტს გაუტოლდება, ანუ, 3 მილიარდ 400 მილიონ ლარს. შემდგომი ათწეულის განმავლობაში, მიმდინარე თუ ყველა მომდევნო მთავრობა ვალდებული იქნება, მთლიანი შიდა პროდუქტის 6 პროცენტი, ანუ, დღევანდელი პარამეტრებით ბიუჯეტის მეოთხედი განათლებაზე, ახალგაზრდობაზე, ადამიანური კაპიტალსა და განვითარებაზე მიმართოს“, – განაცხადა პრემიერმა.