საქართველოს შინაგან საქმეთა მინისტრის მოადგილის, ნათია მეზვრიშვილის განცხადებით, „თიბისი ბანკზე“ კიბერშეტევის საქმის გამოძიების ფარგლებში რუსთაველის 12 ნომრიდან კომპიუტერებია ამოღებული.
როგორც ნათია მეზვრიშვილმა აღნიშნა, „თიბისი ბანკის“ საქმესთან დაკავშირებით შსს აწარმოებს გამოძიებას.
„რამდენიმე თვეა, გამოძიება მიმდინარეობს. ეს გახლავთ საკმაოდ კომპლექსური სისხლის სამართლის საქმე, არ გახლავთ რიგითი საქმე, რომლის გამოძიების დასრულება შესაძლებელი იქნება ერთ დღეში, ორ დღეში და ერთ კვირაში. ჩატარებულია დღემდე არაერთი საგამოძიებო მოქმედება, გამოკითხვები, ამოღებულია კომპიუტერები, მათ შორის რუსთაველის 12 ნომრიდან. მიმდინარეობს ინფორმაციის დამუშავება, შესწავლა. ვერ გეტყვით, როდის დასრულდება გამოძიება, ამ ყველაფერს დრო სჭირდება. რაც შეეხება კითხვას კოკა ყანდიაშვილის შესახებ, ამ ეტაპზე გამოკითხული არ არის. როგორც კი ამის საჭიროება დადგება, აუცილებლად დაიკითხება. შსს -სთვის არასოდეს ყოფილა პრობლემა გამოკითხვა თანამდებობრივი სტატუსის მიუხედავად“, – განაცხადა მეზვრიშვილმა.
შეგახსენებთ , გავრცელებული ინფორმაციით, მამუკა ხაზარაძემ წერილით მიმართა შსს-ს, რომ „თიბისი ბანკზე“ კიბერშეტევა სწორედ რუსთაველის 12 ნომრიდან განხორციელდა.