პოსტსაბჭოთა სივრცის ერთ-ერთი ყველაზე გავლენიანი “კანონიერი ქურდი“ ტარიელ ონიანი რუსეთის საპატიმროს მომავალ კვირას, კერძოდ 9 აპრილს დატოვებს. ამის შესახებ ინფორმაციას რუსული მედია ავრცელებს.
გათავისუფლების მომენტიდან დღის წესრიგში დგება მისი დეპორტაციის საკითხი, ვინაიდან რუსეთის შინაგან საქმეთა სამინისტროს ცნობით, მიღებულია გადაწყვეტილება ტარიელ მულუხოვის (ონიანი) რუსეთის ტერიტორიიდან სამუდამო გაძევების შესახებ. კრიმინალური სამყაროს გავლენიანი ფიგურა რუსეთში გამოძალვისა და ადამიანის გატაცების გამო მისჯილ 10-წლიან სასჯელს მკაცრი რეჟიმის კოლონიაში იხდის. დაგეგმილი დეპორტაციის განკარგულება პატიმარს რამდენიმე თვის წინ უკვე გააცნეს.
სამართალდამცავები აცხადებენ, რომ ტარიელ ონიანს ესპანეთის მოქალაქეობა აქვს, 2010 წელს რუსეთის ფედერალურმა სამსახურმა დაადგინა, რომ ონიანმა რუსეთის მოქალაქეობა არაკანონიერი გზით მიიღო, თუმცა ამასთან დაკავშირებით სასამართლოს გადაწყვეტილება ჯერ არ არსებობს. იყო ვარაუდი, რომ პატიმრობიდან გათავისუფლებულ ტარიელ ონიანს რუსი სამართალდამცავები ესპანეთს გადასცემდნენ, სადაც მას კრიმინალური დაჯგუფების შექმნასა და თანხების არალეგალური გზით მითვისებას სდებენ ბრალად.