ოკუპირებულ ცხინვალში მოკლული არჩილ ტატუნაშვილის დაბადების დღესთან დაკავშირებით, მის საფლავზე პატივის მისაგებად შერიგებისა და სამოქალაქო თანასწორობის საკითხებში სახელმწიფო მინისტრი, ქეთევან ციხელაშვილი ახალგორის მუნიციპალიტეტის გამგეობის თანამშრომლებთან ერთად იმყოფებოდა.
როგორც მან აღნიშნა, ქართული მხარე ყველა ბერკეტს გამოიყენებს იმისათვის, რომ დამნაშავეები დაისაჯონ და ოკუპაციის პირობებში მსგავსი დანაშაული აღარ გამეორდეს. „დღეს, არჩილ ტატუნაშვილი 36 წლის გახდებოდა. ერთ წელზე მეტი გავიდა, რაც უკანონოდ დააკავეს, აწამეს და მოკლეს რუსეთის მიერ ოკუპირებული ცხინვალის რეგიონში. დამნაშავეები, ვინც მას მოუსწრაფა სიცოცხლე და ოჯახსა და თითოეულ ჩვენგანს ეს თარიღი ტრაგედიად უქცია, ჯერ კიდევ დაუსჯელნი არიან.
დღესაც, ჩვენი დელეგაცია ჟენევაში და სახელმწიფო მთლიანად, ყველა ინსტრუმენტის გამოყენებით გააგრძელებს ბრძოლას იმისთვის, რომ ამ მკვლელობის დამნაშავეები დაისაჯონ და მომავალში აღარ ხდებოდეს ის, რაც ხდება ოკუპაციის პირობებში. ვიბრძოლებთ იმისთვის, რომ მივაღწიოთ მიზნებს მშვიდობიანად, რასაც შეეწირა არჩილ ტატუნაშვილი, ოთხოზორია. ჯერ კიდევ, გამოსაძიებელი გვაქვს ირაკლი კვარაცხელიას საქმე. დათო ბაშარული და ჩვენი უამრავი ახალგაზრდა, შეიარაღებული დაპირისპირებებისას, დაიღუპა რუსული აგრესიის დროს. მინდა, კიდევ ერთხელ გამოვხატო თანაგრძნობა ოჯახის მიმართ ჩემი სახელით, მთელი სახელმწიფოს, საქართველოს პრემიერმინისტრის სახელით და ვუთხრა მათ – გვახსოვს, მუდამ გვემახსოვრება, რომ არჩილ ტატუნაშვილი არის გმირი და ყველაფერს გავაკეთებთ, რომ დამნაშავეებმა აგონ პასუხი“, – განაცხადა ქეთევან ციხელაშვილმა.
არჩილ ტატუნაშვილი ოკუპანტებმა 2018 წლის 22 თებერვალს, ახალგორიდან გაიტაცეს. 23 თებერვალს, გამთენიისას კი ცხინვალში გაურკვეველ ვითარებაში გარდაიცვალა. ტატუნაშვილის ცხედარი ქართული მხარის მიერ კონტროლირებად ტერიტორიაზე, დაახლოებით, ერთი თვის შემდეგ, 2018 წლის 20 მარტს გადმოასვენეს.
ქეთევან ციხელაშვილი: არჩილ ტატუნაშვილი გმირია და ყველაფერს გავაკეთებთ, რომ დამნაშავეებმა აგონ პასუხი
2019/04/02 19:21:54
კომენტარები
ნანახია: 489 ჯერ