მზად ვართ ანაკლიის ინვესტორებთან შესახვედრად. ახლა მოლაპარაკება ანაკლიის განვითარების კონსორციუმთან და ინვესტორ ბანკებთან თარიღთან დაკავშირებით მიმდინარეობს, – ამის შესახებ ვიცე-პრემიერმა, რეგიონული განვითარებისა და ინფრასტრუქტურის მინისტრმა მაია ცქიტიშვილმა ჟურნალისტებს ანაკლიის პროექტის ინვესტორებთან მოლაპარაკების პროცესის კომენტირებისას განუცხადა.
მისივე განმარტებით, ინვესტორებთან შეხვედრა აუცილებელია და მთავრობა ამისთვის სრულ მზადყოფნას გამოთქვამს.
„რა თქმა უნდა, ასეთი შეხვედრა უნდა გაიმართოს, რათა მოლაპარაკება და ინვესტორების მოთხოვნის დეტალებში გარკვევა შევძლოთ და პოზიციები შევაჯეროთ. ასე, რომ ჩვენ ამ შეხვედრის სრული მზაობა გვაქვს და იმედი გვაქვს, რომ აპრილში გაიმართება“, – განმარტა ვიცე-პრემიერმა.
ცქიტიშვილის თქმით, ინვესტორებთან მოლაპარაკების შემდეგ გადაწყდება, მისაღებია თუ არა ინვესტორების მიერ წამოყენებული პირობები.
„ასეთი მოლაპარაკების შემდეგ იქნება შესაძლებელი იმის გარკვევა, თუ რომელი პოზიციის დათანხმება იქნება ჩვენთვის მისაღები. შეხვედრა სწორედ იმას ემსახურება, რომ პოზიციები შეჯერდეს და კომპრომისები გამოიძებნოს, რისი სურვილიც ჩვენ გვაქვს“, – განაცხადა მაია ცქიტიშვილმა.