მამუკა ბახტაძე: საქართველო-ბულგარეთს შორის ბუნებრივ ხიდად შავი ზღვაა, რაც უნიკალურ შესაძლებლობებს გვიქმნის

“ჩვენი სავაჭრო და ეკონომიკური კავშირები წარმატებით ვითარდება. გვახარებს იმის აღნიშვნა, რომ, ბოლო წლების განმავლობაში, საქართველოს სავაჭრო პარტნიორების პირველ ათეულში მოექცა ბულგარეთი”, – ამის შესახებ საქართველოს პრემიერმინისტრმა, მამუკა ბახტაძემ ბულგარეთში ბულგარეთის პრემიერმინისტრთან ერთად გამართულ ბრიფინგზე განაცხადა.
​მან საქართველო-ბულგარეთის მრავალწლიან და ისტორიულ ურთიერთობაზეც გაამახვილა ყურადღება.
“საქართველოსა და ბულგარეთს მჭიდრო და მეგობრული ურთიერთობების ხანგრძლივი ისტორია აკავშირებთ. ამ ორ ქვეყანას შორის ისტორიული კავშირები საუკუნეებს ითვლის. ქართველი ძმების, ბაკურიანების მიერ მე-11 საუკუნეში დაარსებული პეტრიწონის მონასტერი ერთ-ერთი ყველაზე ბრწყინვალეა აღმოსავლეთ ევროპის მართლმადიდებლურ მონასტრებს შორის. ის არის საქართველოსა და ბულგარეთის კულტურული და ისტორიული ერთობის ნათელი სიმბოლო.
ჩვენი სავაჭრო და ეკონომიკური კავშირები წარმატებით ვითარდება. გვახარებს იმის აღნიშვნა, რომ, ბოლო წლების განმავლობაში, საქართველოს სავაჭრო პარტნიორების პირველ ათეულში მოექცა ბულგარეთი. თუმცა, სამომავლოდ, ვხედავთ სავაჭრო და ეკონომიკური თანამშრომლობის გაფართოების მნიშვნელოვან პოტენციალს”, – განაცხადა მამუკა ბახტაძემ.
პრემიერის თქმით, საქართველო-ბულგარეთს შორის შავი ზღვა ბუნებრივი ხიდია, რომელიც დიდ პოტენციალს ატარებს.
“დიდად ვაფასებთ ვაჭრობის, ეკონომიკის, მეცნიერებისა და ტექნიკური თანამშრომლობის მიმართულებით საქართველოსა და ბულგარეთის მთავრობათაშორისი კომისიის ქმედით მუშაობას.
მივესალმებით კომისიის ბოლოდროინდელ შეხვედრას, რომლის დროსაც შევთანხმდით და შევაჯერეთ პოზიციები მთელ რიგ მნიშვნელოვან ეკონომიკურ საკითხებზე და გამოვავლინეთ სამომავლო ნაბიჯები, რომელთა გადადგმა იქნება საჭირო ამ მიმართულებით პარტნიორობის კიდევ უფრო დასაახლოებლად.
საქართველო და ბულგარეთი გეოგრაფიულად არიან დაკავშირებული. ჩვენს შორის ბუნებრივ ხიდად წარმოჩინდება შავი ზღვა, რაც უნიკალურ შესაძლებლობებს გვიქმნის და უზარმაზარ პოტენციალს ატარებს. მზად ვართ, ის სრულად გამოვიყენოთ, განსაკუთრებით – ტრანსპორტის სფეროში. დღევანდელ შეხვედრაზე განსაკუთრებული ყურადღება დავუთმეთ საბორნე მიმოსვლის სამომავლო განვითარების შესაძლებლობებს საქართველოსა და ბულგარეთის საზღვაო პორტებს შორის კავშირების განსამტკიცებლად”, – აღნიშნა პრემიერმა.