საქართველოს პრემიერ-მინისტრი მამუკა ბახტაძე აცხადებს, რომ გიორგი ქობულიასთან გუშინაც ჰქონდა შეხვედრა და დღესაც ექნება მთავრობის სხდომის შემდეგ.
„გუშინაც მქონდა შეხვედრა და დღესაც, მთავრობის სხდომის შემდეგ, კიდევ ერთი შეხვედრა მექნება. გარწმუნებთ, ამ მხრივ, არანაირი პრობლემა არ არის და გიორგი ქობულიამ გითხრათ ის, რაც უნდა ეთქვა. გადაწყვეტილება მივიღე მე, მასთან საუბრის შედეგად, ისევე, როგორც გადაწყვეტილება მივიღე ნათია თურნავასთან საუბრის შედეგად და გარწმუნებთ, აქ არაფერი გასაკვირი არ არის“, – განაცხადა მამუკა ბახტაძემ.
ამასთან, მისი შეფასებით, გიორგი ქობულიას მიერ განვლილი კარიერული გზა ნათელი პასუხია მის კომპეტენციასთან დაკავშირებულ საკითხზე.
„ის არის „მაკკენზის“ უფროსი პარტნიორი. თვითონ ეს ფაქტი მეტყველებს, რომ მას აქვს მნიშვნელოვანი ცოდნა და ვფიქრობ, მან ეს მნიშვნელოვანი ცოდნა გამოიყენა იმ განვითარების გეგმების მოსამზადებლად სხვადასხვა ეკონომიკის სექტორების მიხედვით, რომელიც თავს იყრის ერთად ეკონომიკის სამინისტროში. ვფიქრობ, როგორც დღეს, ისე მომავალში, აუცილებლად გამოადგება ქვეყანას“, – განაცხადა მამუკა ბახტაძემ.