მარნეულში 2 წლის ბავშვი მუცლის არეში მაკრატლით დაიჭრა – შემთხვევა, ჯერჯერობით, დაუდგენელ ვითარებაში მოხდა. შემავალი ჭრილობიდან მაკრატლის ამოღება ექიმებმა ქირურგიული ჩარევის გარეშე შეძლეს.
გავრცელებული ინფორმაციით, ახალგაზრდამ ქალმა 2 წლის ვაჟს სცემა, რა დროსაც ბავშვი დაეცა და მაკრატელი გულ-მკერდის არეში შეერჭო. თავად დედა ამ ინფორმაციას კატეგორიულად უარყოფს. ის ამბობს, რომ ხელსაქმით იყო დაკავებული, ბავშვი კი მის სიახლოვეს თამაშობდა, რა დროსაც მისი შვილი წაიქცა და მაკრატელს დაეცა.
„ლეიბს ვკერავდი, ჩემი შვილი ჩემს გვერდით თამაშობდა, უცებ ბავშვის ყვირილზე გავიხედე და დავინახე, რომ ჩემს შვილს გულ-მკერდიდან სისხლი სდიოდა და მაკრატელი ჰქონდა შერჭობილი. ავტეხე ყვირილი, მეზობლები დამეხმარნენ და მეზობლის მანქანით საავადმყოფოში წავიყვანეთ. მე ჩემი შვილისთვის ხელი არასოდეს დამიკარებია, ბავშვი წაიქცა და მაკრატელზე დაეცა“ – ამბობს 2 წლის ბავშვის დედა.
ბავშვის ჯანმრთელობის მდგომარეობის სიმძიმიდან გამომდინარე, ექიმების გადაწყვეტილებით, ბავშვი მარნეულის კლინიკიდან თბილისში, იაშვილის სახელობის კლინიკაში გადაიყვანეს.
ექიმების ინფორმაციით, ბავშვს ჯანმრთელობის მდგომარეობა სტაბილურად მძიმეა და იგი მოთავსებულია კრიტიკული მედიცინის დეპარტამენტში.
